قاراعاندىدا جۇزگە جۋىق جاس «زاڭ جانە ءتارتىپ اۋماعى» اتتى جاستار قۇقىقتىق كۆەستىنە قاتىستى. وعان وبلىستىڭ قالا جانە اۋداندارىنان كەلگەن ون كوماندا قاتىستى. ءىس-شارا «قۇقىق ءتارتىبى الىپپەسى» جوباسى اياسىندا ۇيىمداستىرىلىپ، مەملەكەت باسشىسى ادىلەتتى قوعام قۇرۋدىڭ نەگىزگى قاعيداتتارىنىڭ ءبىرى رەتىندە ايقىنداعان «زاڭ جانە ءتارتىپ» يدەولوگياسىن ىلگەرىلەتۋ جۇمىسىنىڭ ءبىر بولىگىنە اينالدى.
ءداستۇرلى دارىستەر مەن دوڭگەلەك ۇستەلدەردىڭ ورنىنا قاتىسۋشىلارعا قۇقىق قورعاۋ ورگاندارى مەن توتەنشە جاعدايلار قىزمەتتەرىنىڭ جۇمىسىمەن تاجىريبە جۇزىندە تانىسۋ مۇمكىندىگى ۇسىنىلدى.
قۇقىقتىق كۆەستكە قاتىسۋشىلار الدىندا قاراعاندى وبلىسى اكىمىنىڭ ورىنباسارى الىبەك الدەنەي ءسوز سويلەدى.
— بيىل قازاقستاندىقتار رەفەرەندۋمدا جاڭا كونستيتۋتسيانى قابىلداپ، ماڭىزدى تاڭداۋ جاسادى. ونىڭ باستى قاعيداتتارىنىڭ ءبىرى – «زاڭ جانە ءتارتىپ» يدەولوگياسى. بۇل – قاۋىپسىز ءارى ادىلەتتى قوعامنىڭ بەرىك نەگىزى. بۇگىندە جاستاردىڭ قۇقىقتىق ساۋاتتىلىعىن ارتتىرۋعا ەرەكشە كوڭىل ءبولىنىپ وتىر. زاڭدى ءبىلۋ ەڭ الدىمەن ءوز ارەكەتتەرى مەن قابىلداعان شەشىمدەرى ءۇشىن جاۋاپكەرشىلىكتى تۇسىنۋدەن باستالادى. ءدال وسىلاي ءاربىر ازاماتتىڭ الاڭسىز ءومىر ءسۇرىپ، ءبىلىم الىپ، ەڭبەك ەتىپ جانە ءوز مۇمكىندىكتەرىن تولىق جۇزەگە اسىرا الاتىن ورتاسى قالىپتاسادى، — دەدى الىبەك الدەنەي.
ورتالىق ساياباقتا وتكەن اشىلۋ سالتاناتىندا پوليتسيا دەپارتامەنتىنىڭ ارنايى ماقساتتاعى جەدەل ارەكەت ەتۋ جاساعى
مەن كينولوگيالىق قىزمەتىنىڭ كورسەتىلىمدەرى ۇيىمداستىرىلىپ،
ارنايى تەحنيكا كورمەسى قويىلدى.
— ءبىزدىڭ ماقساتىمىز – ازاماتتاردىڭ تىنىشتىعىن كۇزەتىپ، ادامداردىڭ ءومىرىن ساقتاپ جۇرگەن قىزمەتتەردىڭ كۇندەلىكتى ەڭبەگىن كورسەتۋ. بالكىم، بۇگىنگى ءىس-شارا سىزدەردىڭ بولاشاق ماماندىق تاڭداۋلارىڭىزعا ىقپال ەتەر، — دەدى وبلىس پروكۋرورىنىڭ ورىنباسارى ەدىل جۇبانوۆ.
زاڭ تالاپتارىن ساقتاۋدىڭ ماڭىزدىلىعى تۋرالى قاراعاندى وبلىسى پوليتسيا دەپارتامەنتى باستىعىنىڭ ورىنباسارى جاسقايرات قايىروۆ تا اتاپ ءوتتى.
– قازىرگى جاس بۋىن ءوز قۇقىقتارىن ءبىلىپ قانا قويماي، قوعام مەن مەملەكەت الدىنداعى مىندەتتەرىن دە تەرەڭ ءتۇسىنۋى قاجەت. زاڭدى ساقتاۋ – ازاماتتىق كەمەلدىكتىڭ جانە قۇقىقتىق مادەنيەتتىڭ ماڭىزدى كورسەتكىشى، – دەدى ول.
جەرەبە تارتىلعاننان كەيىن كوماندالار تاقىرىپتىق بەكەتتەر بويىنشا ساپارعا شىقتى.
العاشقى ايالداما – «قۇقىق ءتارتىبى اۋماعى» بەكەتى بولدى. مۇندا قاتىسۋشىلار پوليتسيا قىزمەتىنىڭ جۇمىسىمەن جاقىننان تانىستى.
ب. بەيسەنوۆ اتىنداعى قاراعاندى اكادەمياسىندا جاستارعا بولاشاق قۇقىق قورعاۋ ورگاندارى قىزمەتكەرلەرىن دايارلاۋ ۇدەرىسى كورسەتىلدى.
مامانداندىرىلعان ءورت ءسوندىرۋ بولىمىندە جانە جەدەل-قۇتقارۋ جاساعىندا ولار قۇتقارۋ تەحنيكاسىمەن تانىسىپ، توتەنشە جاعدايلار كەزىندە ارەكەت ەتۋ بويىنشا تاجىريبەلىك داعدىلاردى مەڭگەردى.
سونداي-اق تاعى ءبىر بەكەتتە جەدەل جاردەم قىزمەتىنىڭ ماماندارى العاشقى مەديتسينالىق كومەك كورسەتۋ تاسىلدەرىن ۇيرەتتى. ۇلتتىق ۇلاننىڭ اسكەري بولىمىندە قوعامدىق قاۋىپسىزدىكتى قامتاماسىز ەتۋ مىندەتتەرى مەن اسكەري قىزمەتتىڭ ەرەكشەلىكتەرى تۋرالى اقپارات بەرىلدى.
كۆەست قورىتىندىسى بويىنشا ەڭ بەلسەندى قاتىسۋشىلارعا العىس حاتتار مەن ەستەلىك سىيلىقتار تابىستالدى. ۇيىمداستىرۋشىلاردىڭ پىكىرىنشە، مۇنداي جوبالار جاستاردىڭ قۇقىقتىق ساۋاتتىلىعىن ارتتىرىپ قانا قويماي، زاڭ مەن ءتارتىپتى ساقتاۋ جولىنداعى جەكە جاۋاپكەرشىلىكتىڭ ماڭىزىن تەرەڭ تۇسىنۋگە ىقپال ەتەدى.
