Qaraǧandyda jüzge juyq jas «Zaŋ jäne tärtıp aumaǧy» atty jastar qūqyqtyq kvestıne qatysty. Oǧan oblystyŋ qala jäne audandarynan kelgen on komanda qatysty. Is-şara «Qūqyq tärtıbı älıppesı» jobasy aiasynda ūiymdastyrylyp, Memleket basşysy ädılettı qoǧam qūrudyŋ negızgı qaǧidattarynyŋ bırı retınde aiqyndaǧan «Zaŋ jäne tärtıp» ideologiiasyn ılgerıletu jūmysynyŋ bır bölıgıne ainaldy.
Dästürlı därıster men döŋgelek üstelderdıŋ ornyna qatysuşylarǧa qūqyq qorǧau organdary men tötenşe jaǧdailar qyzmetterınıŋ jūmysymen täjıribe jüzınde tanysu mümkındıgı ūsynyldy.
Qūqyqtyq kvestke qatysuşylar aldynda Qaraǧandy oblysy äkımınıŋ orynbasary Älıbek Äldenei söz söiledı.
— Biyl qazaqstandyqtar referendumda jaŋa Konstitusiiany qabyldap, maŋyzdy taŋdau jasady. Onyŋ basty qaǧidattarynyŋ bırı – «Zaŋ jäne tärtıp» ideologiiasy. Būl – qauıpsız ärı ädılettı qoǧamnyŋ berık negızı. Bügınde jastardyŋ qūqyqtyq sauattylyǧyn arttyruǧa erekşe köŋıl bölınıp otyr. Zaŋdy bılu eŋ aldymen öz äreketterı men qabyldaǧan şeşımderı üşın jauapkerşılıktı tüsınuden bastalady. Däl osylai ärbır azamattyŋ alaŋsyz ömır sürıp, bılım alyp, eŋbek etıp jäne öz mümkındıkterın tolyq jüzege asyra alatyn ortasy qalyptasady, — dedı Älıbek Äldenei.
Ortalyq saiabaqta ötken aşylu saltanatynda polisiia departamentınıŋ arnaiy maqsattaǧy jedel äreket etu jasaǧy
men kinologiialyq qyzmetınıŋ körsetılımderı ūiymdastyrylyp,
arnaiy tehnika körmesı qoiyldy.
— Bızdıŋ maqsatymyz – azamattardyŋ tynyştyǧyn küzetıp, adamdardyŋ ömırın saqtap jürgen qyzmetterdıŋ kündelıktı eŋbegın körsetu. Bälkım, bügıngı ıs-şara sızderdıŋ bolaşaq mamandyq taŋdaularyŋyzǧa yqpal eter, — dedı oblys prokurorynyŋ orynbasary Edıl Jūbanov.
Zaŋ talaptaryn saqtaudyŋ maŋyzdylyǧy turaly Qaraǧandy oblysy Polisiia departamentı bastyǧynyŋ orynbasary Jasqairat Qaiyrov ta atap öttı.
– Qazırgı jas buyn öz qūqyqtaryn bılıp qana qoimai, qoǧam men memleket aldyndaǧy mındetterın de tereŋ tüsınuı qajet. Zaŋdy saqtau – azamattyq kemeldıktıŋ jäne qūqyqtyq mädeniettıŋ maŋyzdy körsetkışı, – dedı ol.
Jerebe tartylǧannan keiın komandalar taqyryptyq beketter boiynşa saparǧa şyqty.
Alǧaşqy aialdama – «Qūqyq tärtıbı aumaǧy» beketı boldy. Mūnda qatysuşylar polisiia qyzmetınıŋ jūmysymen jaqynnan tanysty.
B. Beisenov atyndaǧy Qaraǧandy akademiiasynda jastarǧa bolaşaq qūqyq qorǧau organdary qyzmetkerlerın daiarlau üderısı körsetıldı.
Mamandandyrylǧan ört söndıru bölımınde jäne jedel-qūtqaru jasaǧynda olar qūtqaru tehnikasymen tanysyp, tötenşe jaǧdailar kezınde äreket etu boiynşa täjıribelık daǧdylardy meŋgerdı.
Sondai-aq taǧy bır bekette jedel järdem qyzmetınıŋ mamandary alǧaşqy medisinalyq kömek körsetu täsılderın üirettı. Ūlttyq ūlannyŋ äskeri bölımınde qoǧamdyq qauıpsızdıktı qamtamasyz etu mındetterı men äskeri qyzmettıŋ erekşelıkterı turaly aqparat berıldı.
Kvest qorytyndysy boiynşa eŋ belsendı qatysuşylarǧa alǧys hattar men estelık syilyqtar tabystaldy. Ūiymdastyruşylardyŋ pıkırınşe, mūndai jobalar jastardyŋ qūqyqtyq sauattylyǧyn arttyryp qana qoimai, zaŋ men tärtıptı saqtau jolyndaǧy jeke jauapkerşılıktıŋ maŋyzyn tereŋ tüsınuge yqpal etedı.
