22 ماۋسىم كۇنى الماتىداعى «ارمان» كينوتەاترىندا ء«ابىل» ءفيلمىنىڭ جابىق پرەمەرالىق كورسەتىلىمى ءوتدى، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
فيلم قازاق تىلىندە ۇسىنىلدى.
بۇعان دەيىن قازاقستاندىق رەجيسسەر ەلزات ەسكەندىردىڭ ء«ابىل» ءفيلمى فرانتسيا كينوتەاترلارىندا كورسەتىلگەن ەدى.
ء«ابىل» تولىقمەتراجدى كوركەم ءفيلمىنىڭ قويۋشى-وپەراتورى يولانتا دىلەۆسكا مەن اكتەر ەرلان تولەۋتاي 24-ءى Dhaka International Film Festival-دە "ۇزدىك قويۋشى-وپەراتور" جانە"ۇزدىك اكتەر" جۇلدەلەرىنە يە بولعانى بەلگىلى. بيىل اقپان ايىندا فرانتسيانىڭ نانت قالاسىندا وتكەن حالىقارالىق Univerciné à l'Est 2026 كينوفەستيۆالىندە ء«ابىل» ءفيلمى فەستيۆال جەڭىمپازى اتانىپ، وعان قوسا قوس بىردەي جۇلدەگە دە يە بولعان.
اتاپ ايتقاندا:
Jury Grand Prize (قازىلار القاسىنىڭ باس جۇلدەسى)
Critical Jury Prize (كينوسىنشىلار القاسىنىڭ جۇلدەسى)
NETPAC Jury Prize (NETPAC قازىلار القاسىنىڭ جۇلدەسى)
ايتا كەتەيىك، فيلم كەڭەس وداعى قۇلاپ، كولحوز-سوۆحوز تاراپ، مال-مۇلىك بولىسكە ءتۇسىپ، ەلدە پريۆاتيزاتسيا ورىن العان كەزەڭدەگى قياناتقا ۇشىراعان قاراپايىم ادامدار مەن قاراۋسىز قالعان قازاق اۋىلىنداعى بەيبەرەكەتسىزدىكتى سۋرەتتەيدى. سول ارقىلى كينوتۋىندى تاۋەلسىزدىك باسىنداعى كۇردەلى ۋاقىت اياسىنداعى قازاق حالقىنىڭ رۋحاني كەيپىنە، پسيحولوگيالىق كۇيىنە الەۋمەتتىك تالداۋ جاسايدى. فيلمدە كەڭەستىك جۇيە كەزىندەگى ادام ءومىرىنىڭ قۇنسىزدىعى، قازاق حالقىنىڭ باستان كەشكەن جاعدايى، تۇرمىس قالپى، ءوز ەلىندە، ءوز جەرىندە ديسكريميناتسياعا تۇسكەندىگى، سوتسياليزمنەن كاپيتاليزمگە اۋىسۋ تۇسىنداعى ەكىۇداي سەزىم، سونىمەن قاتار جەمقورلىقتىڭ پايدا بولۋى جايلى دا وي قوزعايدى.
ء«ابىل» ءفيلمىنىڭ الەمدىك پرەمەراسى 29-بۋسان حالىقارالىق كينوفەستيۆالىندە وتكەن. ودان كەيىن ساپارى گونكونگ حالىقارالىق ازيا كينوفەستيۆالى، سكانديناۆيا ءوڭىرىنىڭ ەڭ باستى 48-گەتەبورگ حالىقارالىق كينوفەستيۆالدارىنا قاتىسۋمەن جالعاسىپ، اۋديتوريانىڭ ۇلكەن قىزىعۋشىلىعىن تۋدىرعان.
