قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ ۇلتتىق تەستىلەۋ ورتالىعى تالاپكەرلەر مەن ولاردىڭ اتا-انالارىنا ۇبت سەرتيفيكاتىنا قاتىستى ۇندەۋ جاسادى، دەپ حابارلايدى "ادىرنا".
ورتالىقتىڭ 25 ماۋسىمداعى مالىمەتىنشە، ۇبت سەرتيفيكاتىن قولدان جاساۋ مۇمكىن ەمەس.
ء"اربىر سەرتيفيكاتتا ونىڭ تۇپنۇسقالىعىن بىردەن تەكسەرۋگە مۇمكىندىك بەرەتىن بىرەگەي QR-كود بار. سونىمەن قاتار ۇبت سەرتيفيكاتى رەسمي قۇجات بولىپ سانالادى جانە ونى قولدان جاساۋ قازاقستان رەسپۋبليكاسى قىلمىستىق كودەكسىنىڭ 385-بابىنا سايكەس قىلمىستىق جاۋاپكەرشىلىككە اكەپ سوعادى", – دەپ مالىمدەدى ۇلتتىق تەستىلەۋ ورتالىعى.ۆەدومستۆو وكىلدەرى سەرتيفيكاتتى قولدان جاساۋعا قاتىستى بارلىق ارەكەت قۇقىق قورعاۋ ورگاندارىنا جولدانىپ، زاڭ اياسىندا ءتيىستى شارالار قابىلداناتىنىن اتاپ ءوتتى.
سونداي-اق تالاپكەرلەر مەن ولاردىڭ اتا-انالارىنا ۇبت سەرتيفيكاتىن app.testcenter.kz سايتىنداعى جەكە كابينەتتەن، certificate.testcenter.kz پورتالىنان جانە eGov ەلەكتروندىق ۇكىمەتى ارقىلى الۋعا بولاتىنى ەسكە سالىندى.
بۇدان بولەك، ۇلتتىق تەستىلەۋ ورتالىعى ەمتيحان كەزىندە ميكروقۇلاققاپتار، جاسىرىن كامەرالار جانە اقپاراتتى جاسىرىن تۇردە الۋعا ارنالعان وزگە دە ارنايى تەحنيكالىق قۇرالداردى پايدالانۋدىڭ زاڭ الدىندا جاۋاپكەرشىلىككە اكەلۋى مۇمكىن ەكەنىن ەسكەرتتى.
"قۇرمەتتى تالاپكەرلەر! زاڭدى بۇزۋعا باعىتتالعان كەز كەلگەن ارەكەتتەن باس تارتۋعا شاقىرامىز. ادال ەڭبەك پەن ادىلدىك سىزدەردى الدەقايدا ۇلكەن جەتىستىككە جەتكىزەتىنىنە سەنىمدىمىز", – دەلىنگەن ورتالىقتىڭ ۇندەۋىندە.
ۇقساس جاڭالىقتار
