قوستاناي وبلىسىندا اگروونەركاسىپ كەشەنىن دامىتۋعا باعىتتالعان ينۆەستيتسيالىق جوبالاردى جۇزەگە اسىرۋ جالعاسۋدا. وڭىردە وندىرىستىك قۋاتتاردى ارتتىرۋ، اۋىل شارۋاشىلىعى ونىمدەرىن وڭدەۋدى دامىتۋ، جاڭا جۇمىس ورىندارىن اشۋ جانە ازىق-تۇلىك قاۋىپسىزدىگىن قامتاماسىز ەتۋ ماقساتىندا اۋقىمدى جوبالار قولعا الىنعان.
سوڭعى جىلدارى وبلىستىڭ اگروسەكتورىنا ينۆەستيتسيا تارتۋ جۇمىستارى جۇيەلى تۇردە جۇرگىزىلىپ كەلەدى. جالپى قۇنى 84 ملرد تەڭگەنى قۇرايتىن 144 ينۆەستيتسيالىق جوبا ىسكە اسىرىلىپ، ناتيجەسىندە 980 جاڭا جۇمىس ورنى اشىلدى. 2025 جىلدىڭ وزىندە 26,2 ملرد تەڭگە كولەمىندەگى 33 جوبا پايدالانۋعا بەرىلدى.
ىسكە قوسىلعان جوبالاردىڭ نەگىزگى باعىتتارى – ونەركاسىپتىك ءسۇت-تاۋار فەرمالارىن سالۋ، سۋارمالى ەگىنشىلىكتى دامىتۋ جانە اۋىل شارۋاشىلىعى ونىمدەرىن تەرەڭ وڭدەۋ. ءاربىر ءىرى جوبانىڭ قۇنى 1 ملرد تەڭگەدەن اسادى.
ءسۇتتى مال شارۋاشىلىعى سالاسىندا جالپى ينۆەستيتسيا كولەمى 16,4 ملرد تەڭگەنى قۇرايتىن ءتورت جوبا جۇزەگە اسىرىلدى. ناتيجەسىندە 3,3 مىڭ باسقا ارنالعان زاماناۋي مال شارۋاشىلىعى كەشەندەرى ىسكە قوسىلىپ، شامامەن 140 جۇمىس ورنى قۇرىلدى. جاڭا كاسىپورىنداردىڭ جىلدىق وندىرىستىك قۋاتى 27,2 مىڭ توننا ءسۇتتى قۇرايدى. بۇل وڭىردەگى ءسۇت وڭدەۋ كاسىپورىندارىن تۇراقتى شيكىزاتپەن قامتاماسىز ەتۋگە مۇمكىندىك بەرەدى.
سۋارمالى ەگىنشىلىكتى دامىتۋ باعىتىندا دا بىرقاتار جوبالار جۇزەگە اسىرىلدى. جالپى قۇنى 2,4 ملرد تەڭگە بولاتىن ەكى جوبا اياسىندا 1,5 مىڭ گەكتار جەر سۋارمالى القاپقا اينالدى. بۇل سۋ ۇنەمدەۋ تەحنولوگيالارىن ەنگىزۋگە جانە اۋىل شارۋاشىلىعى جەرلەرىن ءتيىمدى پايدالانۋعا جول اشتى.
سونىمەن قاتار وبلىستا اۋىل شارۋاشىلىعى شيكىزاتىن تەرەڭ وڭدەۋگە باعىتتالعان وندىرىستەر دامۋدا. ينۆەستيتسيا كولەمى 1,1 ملرد تەڭگەنى قۇرايتىن ەت-سۇيەك ۇنىن ءوندىرۋ تسەحى ىسكە قوسىلدى. بۇل سالاداعى قوسىلعان قۇنى جوعارى ءونىم ءوندىرىسىن ارتتىرۋعا مۇمكىندىك بەرەدى.
ءسۇت ءوندىرىسىن دامىتۋعا باسىمدىق بەرىلۋدە
قوستاناي وبلىسىندا ءسۇتتى مال شارۋاشىلىعىن دامىتۋ نەگىزگى باعىتتاردىڭ ءبىرى بولىپ وتىر. سولتۇستىك قازاقستان وبلىسىنىڭ تاجىريبەسىن تاراتۋ باعدارلاماسى اياسىندا 49 ملرد تەڭگە قاراستىرىلىپ، ونىڭ 37,8 ملرد تەڭگەسى جىلىنا 80 مىڭ توننا ءسۇت وندىرۋگە مۇمكىندىك بەرەتىن 13 ءسۇت-تاۋار فەرماسىن سالۋعا باعىتتالدى.
قازىرگى ۋاقىتتا جىلدىق قۋاتى 46 مىڭ توننا ءسۇت وندىرۋگە جەتەتىن جەتى فەرما ىسكە قوسىلدى. بۇل كەشەندەردە 5,7 مىڭ باس ءىرى قارا مال وسىرىلۋدە. جوبالار كەزەڭ-كەزەڭىمەن تولىق قۋاتىنا شىعارىلادى.
باعدارلاما اياسىندا بيىل تاعى دا بىرقاتار جوبالاردى قارجىلاندىرۋ جوسپارلانعان. ونىڭ ىشىندە «حالىق اگرو KST» سەرىكتەستىگىنىڭ 5,2 مىڭ تونناعا ارنالعان كوكونىس ساقتاۋ قويماسىن سالۋ جوباسى بار. جوبانىڭ قۇنى – 1,2 ملرد تەڭگە.
سونداي-اق «قوستاناي وسەتر» سەرىكتەستىگى فورەل ءوسىرۋ جانە وڭدەۋ تسەحىن سالۋ جوباسىن جۇزەگە اسىرۋدا. كاسىپورىن جىلىنا 50 توننا ءونىم وندىرۋگە مۇمكىندىك الادى.
جاڭا وندىرىستەر مەن ءىرى جوبالار جۇزەگە اسىرىلادى
الداعى جىلدارعا ارنالعان ينۆەستيتسيالىق جوبالاردىڭ جول كارتاسىنا سايكەس، 2026–2028 جىلدارى وبلىستا جالپى قۇنى 553 ملرد تەڭگە بولاتىن 42 جوبانى ىسكە اسىرۋ جوسپارلانعان. ناتيجەسىندە 4 مىڭنان استام جاڭا جۇمىس ورنى اشىلادى.
2026 جىلى قۇنى 35 ملرد تەڭگە بولاتىن التى جوبانى ىسكە قوسۋ كوزدەلگەن. ونىڭ ىشىندە بەس ءسۇت-تاۋار فەرماسى پايدالانۋعا بەرىلىپ، وڭىردەگى ءسۇت ءوندىرىسىنىڭ كولەمى ارتادى. سونىمەن قاتار «بايان سۇلۋ» اكتسيونەرلىك قوعامىنىڭ «كونديتەرلىك استانا» جوباسى جۇزەگە اسىرىلماق.
جوبا اياسىندا كاسىپورىننىڭ كونديتەرلىك ءونىم شىعارۋ كولەمى جىلىنا قوسىمشا 16 مىڭ تونناعا ۇلعايىپ، 260 جاڭا جۇمىس ورنى اشىلادى. تولىق قۋاتىنا شىققاننان كەيىن ءوندىرىس كولەمى جىلىنا 68 مىڭ تونناعا جەتەدى.
كەلەر جىلى وبلىستا جالپى قۇنى 49,1 ملرد تەڭگە بولاتىن ەكى ءىرى وڭدەۋ جوباسىن ىسكە اسىرۋ جوسپارلانىپ وتىر. بەيىمبەت مايلين اۋدانىندا استىق پەن مايلى داقىلداردى ساقتاۋ جانە وڭدەۋ كەشەنى، سونداي-اق كوكونىس قويماسى بار كولىك-لوگيستيكالىق ورتالىق سالىنادى. جوبانىڭ قۇنى – 10 ملرد تەڭگە.
ليساكوۆ قالاسىندا قۇنى 39,1 ملرد تەڭگە بولاتىن ماي ەكستراكتسيالاۋ زاۋىتى بوي كوتەرەدى. كاسىپورىن كۇنباعىس پەن راپستى وڭدەپ، جىلىنا 174 مىڭ توننا دايىن ءونىم شىعارۋعا مۇمكىندىك بەرەدى.
اۋىل شارۋاشىلىعى ونىمدەرىن تەرەڭ وڭدەۋ كۇشەيەدى
وڭىردە اۋىل شارۋاشىلىعى ونىمدەرىن تەرەڭ وڭدەۋگە باعىتتالعان ستراتەگيالىق جوبالار دا جۇزەگە اسىرىلۋدا.
بەيىمبەت مايلين اۋدانىندا «Qostanai Grain Industry» سەرىكتەستىگى استىقتى تەرەڭ وڭدەۋ زاۋىتىن سالۋدى جوسپارلاپ وتىر. جوبا اياسىندا 187 گەكتار جەر بولىنگەن. كاسىپورىن ىسكە قوسىلعان كەزدە 700 جاڭا جۇمىس ورنى اشىلادى. زاۋىت جىلىنا 415 مىڭ توننا استىق وڭدەپ، گليۋتەن، كراحمال، امينقىشقىلدارى، بيوەتانول جانە باسقا دا ونىمدەر وندىرەدى.
سونىمەن قاتار رۋدنىي قالاسىندا قۇنى 100,5 ملرد تەڭگە بولاتىن قانت زاۋىتىن سالۋ جوسپارلانعان. كاسىپورىننىڭ وندىرىستىك قۋاتى جىلىنا 200 مىڭ توننا قانت وندىرۋگە مۇمكىندىك بەرەدى.
فەدوروۆ اۋدانىندا جىلىنا 50 مىڭ توننا قۇس ەتىن وندىرەتىن زاماناۋي قۇس فابريكاسىن سالۋ كوزدەلگەن. جوبانىڭ ينۆەستيتسيالىق قۇنى – 66,3 ملرد تەڭگە. جاڭا ءوندىرىس ىشكى نارىقتى وتاندىق ونىممەن قامتاماسىز ەتۋگە جانە ءوڭىردىڭ ەكسپورتتىق الەۋەتىن ارتتىرۋعا ىقپال ەتەدى.
وسىلايشا قوستاناي وبلىسىندا اگروونەركاسىپ كەشەنىن جاڭعىرتۋعا باعىتتالعان كەشەندى ينۆەستيتسيالىق ساياسات جۇزەگە اسىرىلۋدا. جاڭا وندىرىستەردىڭ ىسكە قوسىلۋى اۋىل شارۋاشىلىعى ونىمدەرىن تەرەڭ وڭدەۋدى دامىتۋعا، يمپورتتى الماستىرۋعا، ەكسپورت كولەمىن ۇلعايتۋعا جانە ءوڭىر ەكونوميكاسىنىڭ تۇراقتى ءوسۋىن قامتاماسىز ەتۋگە مۇمكىندىك بەرەدى.
