ءاليا بەكماعامبەتوۆا قوستاناي وبلىسى اكىمدىگىنىڭ قوعامدىق دامۋ باسقارماسىنىڭ باسشىسى لاۋازىمىنا تاعايىندالدى. بۇل تۋرالى 17 قىركۇيەكتە وبلىس اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«قوستاناي وبلىسى اكىمىنىڭ وكىمىمەن جانە قازاقستان رەسپۋبليكاسى پرەزيدەنتى اكىمشىلىگىنىڭ كەلىسىمى بويىنشا ءاليا مولدابايقىزى بەكماعامبەتوۆا قوستاناي وبلىسى اكىمدىگىنىڭ قوعامدىق دامۋ باسقارماسىنىڭ باسشىسى لاۋازىمىنا تاعايىندالدى»،—دەلىنگەن حابارلامادا.
ءاليا مولدابايقىزى 1979 جىلى قوستاناي وبلىسىندا دۇنيەگە كەلگەن.
قوستاناي گۋمانيتارلىق ينستيتۋتىن «قازاق ءتىلى مەن ادەبيەتى مۇعالىمى» ماماندىعى بويىنشا، سونداي-اق ا. بايتۇرسىنوۆ اتىنداعى قوستاناي وڭىرلىك ۋنيۆەرسيتەتىن «قۇقىق باكالاۆرى» ماماندىعى بويىنشا بىتىرگەن.
ەڭبەك جولىن ءاليا مولدابايقىزى 2000 جىلى تاريح ءپانىنىڭ مۇعالىمى ءارى وقۋ ءبولىمىنىڭ مەڭگەرۋشىسى قىزمەتىنەن باستاعان.
2009–2022 جىلدار ارالىعىندا سارىكول اۋداندىق اكىمدىگىندە بىرقاتار باسشىلىق لاۋازىمدا قىزمەت اتقاردى: مادەنيەت جانە تىلدەردى دامىتۋ ءبولىمىنىڭ باسشىسى، اۋدان اكىمى اپپاراتىنىڭ باسشىسى، اۋدان اكىمىنىڭ ورىنباسارى.
2022–2023 جىلدارى قوستاناي وبلىسى اكىمى اپپاراتىنىڭ ۇيىمداستىرۋ-ينسپەكتورلىق ءبولىمىن باسقارعان.
2023 جىلعى مامىر ايىنان 2025 جىلعى قىركۇيەك ايىنا دەيىن سارىكول اۋدانى اكىمىنىڭ ورىنباسارى لاۋازىمىندا بولدى.
«ادىرنا» ۇلتتىق پورتالى ءاليا مولدابايقىزىن جاڭا قىزمەتكە تاعايىندالۋىمەن قۇتتىقتاپ، شىعارماشىلىق تابىس تىلەيدى!
