1996 جىلعى «ساياسي پارتيالار تۋرالى» زاڭ قازاقستانداعى كوپپارتيالىق جۇيەنىڭ دامۋىنا نەگىز قالادى، دەپ حابارلايدى "ادىرنا" ۇلتتىق پورتالى.
1996 جىلدىڭ 2 شىلدەسىندە «قازاقستان رەسپۋبليكاسىنداعى ساياسي پارتيالار تۋرالى» №16-I زاڭ قابىلدانىپ، ەلدەگى ساياسي پارتيالاردىڭ قۇرىلۋى مەن قىزمەتىن رەتتەيتىن نەگىزگى قۇقىقتىق تەتىكتەر ايقىندالدى. قابىلدانعان زاڭنىڭ باستى ماقساتى – ءبىر پارتيانىڭ ساياسي مونوپولياسىنىڭ قالىپتاسۋىنا جول بەرمەۋ جانە كوپپارتيالىق قاعيداتىن دامىتۋ بولدى. قۇجاتقا سايكەس، ساياسي پارتيالار اۋماقتىق قاعيدات بويىنشا قۇرىلۋعا ءتيىس بولدى. سونىمەن قاتار مەملەكەتتىك ورگانداردا ساياسي پارتيالار قۇرۋعا، سونداي-اق اسكەريلەندىرىلگەن ساياسي پارتيالاردى ۇيىمداستىرۋعا جانە ولاردىڭ قىزمەتىنە تىيىم سالىندى.
زاڭ ساياسي پارتيا ۇعىمىن ناقتىلاپ، ونى قازاقستان رەسپۋبليكاسى ازاماتتارىنىڭ مەملەكەتتىك بيلىكتى جۇزەگە اسىرۋ ىسىنە ءوز وكىلدەرى ارقىلى قاتىسۋىنا مۇمكىندىك بەرەتىن ەرىكتى بىرلەستىك رەتىندە ايقىندادى.
قۇجاتقا سايكەس، قازاقستان ازاماتتارىنىڭ ساياسي پارتيالارعا ەركىن بىرىگۋ قۇقىعى بەكىتىلدى. ءار ازاماتتىڭ تەك ءبىر عانا ساياسي پارتياعا مۇشە بولۋىنا رۇقسات ەتىلىپ، پارتياعا مۇشەلىك ازاماتتاردىڭ قۇقىقتارى مەن بوستاندىقتارىن شەكتەۋگە نەگىز بولا المايتىنى بەلگىلەندى. سونداي-اق ازاماتتاردىڭ قانداي پارتياعا مۇشە ەكەنىن كورسەتۋگە نەمەسە كورسەتپەۋگە قۇقىعى زاڭمەن قورعالدى.
زاڭدا مەملەكەت پەن ساياسي پارتيالاردىڭ ءوزارا قارىم-قاتىناسىنىڭ نەگىزگى قاعيداتتارى دا ايقىندالدى. اتاپ ايتقاندا، مەملەكەتتىڭ ساياسي پارتيالاردىڭ قىزمەتىنە زاڭسىز ارالاسۋىنا جانە پارتيالاردىڭ مەملەكەتتىك ورگانداردىڭ قىزمەتىنە ىقپال ەتۋىنە جول بەرىلمەيتىنى كورسەتىلدى. سونىمەن بىرگە ساياسي پارتيالاردى مەملەكەتتىك بيۋدجەتتەن قارجىلاندىرۋعا تىيىم سالىندى.
قۇجاتتا پارلامەنت دەپۋتاتتارى مەن ۇكىمەت مۇشەلەرىنىڭ ساياسي پارتيالاردا اقى تولەنەتىن قىزمەت اتقارۋىنا شەكتەۋ قويىلىپ، مەملەكەتتىك قىزمەتشىلەردىڭ قىزمەتتىك مىندەتتەرىن ورىنداۋ كەزىندە ساياسي پارتيالاردىڭ شەشىمدەرىنە تاۋەلدى بولماۋى كەرەكتىگى بەلگىلەندى. 1996 جىلعى زاڭنىڭ قابىلدانۋى ەلدەگى پارتياىشىلىك قۇرىلىمدى جەتىلدىرۋگە، وڭىرلىك پارتيالىق جەلىلەردى دامىتۋعا جانە ساياسي ۇيىمداردىڭ باعدارلامالىق بازاسىن نىعايتۋعا ىقپال ەتتى. وسى كەزەڭدە قوعامدىق بىرلەستىكتەر مەن ساياسي قوزعالىستاردىڭ بەلسەندىلىگى ارتىپ، قازاقستانداعى كوپپارتيالىق جۇيەنىڭ قالىپتاسۋ ۇدەرىسى جاڭا دەڭگەيگە كوتەرىلدى.
كەيىن بۇل زاڭنىڭ كۇشى 2002 جىلعى 15 شىلدەدە قابىلدانعان №344-II «ساياسي پارتيالار تۋرالى» جاڭا زاڭنىڭ قابىلدانۋىنا بايلانىستى جويىلدى.
