وليمپيادا چەمپيونى دانيار ەلەۋسىنوۆ 20 تاۋلىككە اكىمشىلىك قاماۋعا الىنىپ، 7 جىلعا جۇرگىزۋشى كۋالىگىنەن ايىرىلدى، دەپ حابارلايدى «ادىرنا» ءتىلشىسى.
بۇگىن، 9 شىلدەدە استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى سپورتشىعا قاتىستى ءىستى قارادى. سوت ماتەريالدارىنا سايكەس، دانيار ەلەۋسىنوۆ الكوگولدىك ماساڭ كۇيدە كولىك تىزگىندەپ، قىسقا ۋاقىت ارالىعىندا ەلوردا كوشەلەرىندە ءۇش بىردەي جول-كولىك وقيعاسىنا قاتىسقان.
الدىمەن ول جەراستى اۆتوتۇراعى قاقپاسىنىڭ تىرەگىنە سوقتىعىسقان. كەيىن باسقا كولىكپەن سوقتىعىسىپ، سونىڭ سالدارىنان تاعى بىرنەشە اۆتوكولىككە زاقىم كەلگەن. بۇدان سوڭ سپورتشى باسقارعان كولىك Kia Sportage اۆتوكولىگىمەن سوقتىعىسىپ، سوققىنىڭ اسەرىنەن ول Toyota Hilux كولىگىنە بارىپ سوعىلعان.
«جول-كولىك وقيعالارى سالدارىنان كولىكتەرگە مەحانيكالىق زاقىم كەلىپ، ماتەريالدىق شىعىن كەلتىرىلگەن. قۇقىق بۇزۋشىنىڭ كىناسى ءىس ماتەريالدارىمەن، ونىڭ ىشىندە مەديتسينالىق كۋالاندىرۋ قورىتىندىسىمەن دالەلدەندى. قورىتىندىعا سايكەس، ە.-دە الكوگولدىك ماساڭدىقتىڭ جەڭىل دارەجەسى انىقتالعان. سونداي-اق اكىمشىلىك قۇقىق بۇزۋشىلىق تۋرالى حاتتامالار، جول-كولىك وقيعالارىنىڭ سىزبالارى، بەينەجازبالار، قاتىسۋشىلاردىڭ تۇسىنىكتەمەلەرى جانە سوت زەرتتەگەن وزگە دە دالەلدەر بار»، – دەلىنگەن سوت ماتەريالدارىندا.
ءىس اكىمشىلىك قۇقىق بۇزۋشىلىق تۋرالى كودەكستىڭ 608-بابىنىڭ 3-بولىگى (جۇرگىزۋشىنىڭ كولىك قۇرالىن الكوگولدىك ماساڭ كۇيدە باسقارۋى) بويىنشا قوزعالعان. سوت وتىرىسىندا ەلەۋسىنوۆ ءوز كىناسىن تولىق مويىندادى.
بۇعان دەيىن استانا پوليتسەيلەرىنىڭ سپورتشىنى ۇستاعانىن جازعان ەدىك.
