تابيعاتقا جاناشىرلىق – حالقىمىزدىڭ سان عاسىرلىق بولمىسىمەن بىتە قايناسقان اسىل قۇندىلىقتاردىڭ ءبىرى. «بۇلاق كورسەڭ، كوزىن اش» دەگەن اتالى ءسوز بۇگىنگى كۇنى دە ءوز ماڭىزىن جوعالتقان جوق. بۇگiندەرi مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىپ جاتقان «تازا قازاقستان» جالپىۇلتتىق باعدارلاماسى اياسىندا بۇل ۇستانىم جاڭا مازمۇنعا يە بولىپ، ناقتى ىستەر ارقىلى جالعاسىن تابۋدا. سونىڭ ءبىر ايقىن كورىنىسى – اقمولا وبلىسىنىڭ بۋراباي اۋدانىندا وتكەن ء«مولدىر بۇلاق» رەسپۋبليكالىق ەكولوگيالىق اكتسياسى.
بۋراباي تورىندە ۇيىمداستىرىلعان اكتسياعا مەملەكەتتىك ورگانداردىڭ وكىلدەرى، قوعام بەلسەندىلەرى، ەرىكتىلەر، جاستار ۇيىمدارى مەن جەرگىلىكتى تۇرعىندار قاتىستى. ولار تابيعي بۇلاقتىڭ كوزىن اشىپ، اينالاسىن تۇرمىستىق قالدىقتاردان تازالاپ، اباتتاندىرۋ جۇمىستارىن جۇرگىزدى. بۇل باستاما قورشاعان ورتانى قورعاۋعا عانا ەمەس، تابيعاتقا دەگەن قۇرمەتتى دارىپتەۋگە باعىتتالعان ماڭىزدى قوعامدىق شاراعا اينالدى.
سالتاناتتى جيىندا اقمولا وبلىسى اكىمىنىڭ ءبىرىنشى ورىنباسارى ەلدوس رامازانوۆ وڭىردە ەكولوگيالىق باعىتتاعى جۇمىستار جۇيەلى تۇردە جۇزەگە اسىرىلىپ جاتقانىن اتاپ ءوتتى.
– بيىل مەملەكەتتىك ورمان قورى اۋماعىندا 3 مىڭ گەكتار جەرگە 20 ميلليوننان استام اعاش وتىرعىزۋ جوسپارلانىپ وتىر. بۇل – وڭىردەگى ەكولوگيالىق احۋالدى جاقسارتۋعا باعىتتالعان جۇيەلى جۇمىستاردىڭ جالعاسى. تابيعاتتى قورعاۋ – بۇگىنگى بۋىننىڭ عانا ەمەس، كەلەشەك ۇرپاق الدىنداعى ورتاق جاۋاپكەرشىلىگى، – دەدى ەلدوس رامازانوۆ.
ونىڭ ايتۋىنشا، «تازا قازاقستان» باستاماسى اياسىندا وبلىستا كەڭ اۋقىمدى جۇمىستار اتقارىلىپ كەلەدى. مىڭداعان اۋلا مەن قوعامدىق كەڭىستىكتەر تازارتىلىپ، تاريحي-مادەني ەسكەرتكىشتەردىڭ اۋماعى اباتتاندىرىلدى. ونداعان مىڭ اعاش كوشەتى وتىرعىزىلىپ، قالدىقتاردى سۇرىپتاۋ مەن قايتا وڭدەۋگە باعىتتالعان جاڭا جوبالار قولعا الىنۋدا. بۇل جۇمىستاردىڭ بارلىعى ءوڭىردىڭ ەكولوگيالىق مادەنيەتىن قالىپتاستىرۋعا جانە تۇرعىنداردىڭ تابيعاتقا دەگەن جاۋاپكەرشىلىگىن ارتتىرۋعا باعىتتالعان.
ءىس-شاراعا قاتىسقان قازاقستان رەسپۋبليكاسى سۋ رەسۋرستارى جانە يرريگاتسيا مينيسترلىگىنىڭ سۋ شارۋاشىلىعى كوميتەتىنىڭ توراعاسى ارسەن جاقانباەۆ اكتسيانىڭ ءمانى تەك بۇلاقتاردى تازالاۋمەن شەكتەلمەيتىنىن اتاپ ءوتتى.
– «بۇل اكتسيانىڭ نەگىزگى ماقساتى – بۇلاقتاردىڭ كوزىن اشىپ، اينالاسىن تازارتۋ. "بۇلاق كورسەڭ، كوزىن اش" دەگەن حالقىمىزدىڭ ناقىلى بەكەر ايتىلماعان. بۇل – ۇرپاقتان-ۇرپاققا جالعاسىپ كەلە جاتقان ءداستۇرىمىز. ءبىز سول يگى ءداستۇردى بۇگىنگى كۇنى دە جالعاستىرىپ كەلەمىز»، – دەدى كوميتەت توراعاسى.
اكتسيا بارىسىندا جاستاردىڭ بەلسەندىلىگى ەرەكشە كوزگە ءتۇستى. ولار تازالىق جۇمىستارىمەن قاتار، تابيعاتتى قورعاۋدىڭ ماڭىزىن ناسيحاتتاپ، ءوز قاتارلاستارىن ەكولوگيالىق مادەنيەتتى قالىپتاستىرۋعا ۇندەدى.
«جاسىل ەل» ەڭبەك جاساعىنىڭ مۇشەسى نۇرگۇل تۇراباي مۇنداي باستامالاردىڭ تاربيەلىك ءمانى زور ەكەنىن ايتادى.
– تابيعاتتى قورعاۋ ءار ادامنىڭ بويىندا جاستايىنان قالىپتاسۋى كەرەك. سوندىقتان مۇنداي اكتسيالاردىڭ مەكتەپ وقۋشىلارى مەن جاستار ءۇشىن تاربيەلىك ماڭىزى وتە جوعارى. وسىنداي شارالارعا قاتىسۋ ارقىلى اركىم تۋعان جەردىڭ تازالىعى وزىنەن باستالاتىنىن تۇسىنەدى، – دەيدى نۇرگۇل تۇراباي.
ء«مولدىر بۇلاق» اكتسياسى بۇگىندە تابيعي سۋ كوزدەرىن تازارتۋ جۇمىسى عانا ەمەس، قوعامدى ورتاق ماقساتقا جۇمىلدىراتىن ماڭىزدى ەكولوگيالىق قوزعالىسقا اينالىپ وتىر. مۇنداي باستامالار ادامداردىڭ تابيعاتقا دەگەن كوزقاراسىن وزگەرتىپ، تۋعان جەرگە جاناشىرلىقپەن قاراۋدىڭ ناقتى ۇلگىسىن كورسەتەدى.
بۋرابايداعى يگى ءىس تاعى ءبىر ماڭىزدى شىندىقتى ايقىن اڭعارتتى: تابيعاتتى قورعاۋ – بەلگىلى ءبىر مەكەمەنىڭ نەمەسە ەرىكتىلەردىڭ عانا مىندەتى ەمەس. بۇل – ءار ازاماتتىڭ كۇندەلىكتى ومىرلىك ۇستانىمىنا اينالۋى ءتيىس ورتاق قۇندىلىق. ال ء«مولدىر بۇلاق» اكتسياسى سول قۇندىلىقتاردى جاڭعىرتىپ، تابيعات پەن قوعام اراسىنداعى ۇيلەسىمدى بايلانىستى نىعايتاتىن يگى باستاما رەتىندە ءوز جالعاسىن تابا بەرەدى.
