Tabiǧatqa janaşyrlyq – halqymyzdyŋ san ǧasyrlyq bolmysymen bıte qainasqan asyl qūndylyqtardyŋ bırı. «Būlaq körseŋ, közın aş» degen ataly söz bügıngı künı de öz maŋyzyn joǧaltqan joq. Büginderi Memleket basşysy Qasym-Jomart Toqaevtyŋ bastamasymen jüzege asyp jatqan «Taza Qazaqstan» jalpyūlttyq baǧdarlamasy aiasynda būl ūstanym jaŋa mazmūnǧa ie bolyp, naqty ıster arqyly jalǧasyn tabuda. Sonyŋ bır aiqyn körınısı – Aqmola oblysynyŋ Burabai audanynda ötken «Möldır būlaq» respublikalyq ekologiialyq aksiiasy.
Burabai törınde ūiymdastyrylǧan aksiiaǧa memlekettık organdardyŋ ökılderı, qoǧam belsendılerı, erıktıler, jastar ūiymdary men jergılıktı tūrǧyndar qatysty. Olar tabiǧi būlaqtyŋ közın aşyp, ainalasyn tūrmystyq qaldyqtardan tazalap, abattandyru jūmystaryn jürgızdı. Būl bastama qorşaǧan ortany qorǧauǧa ǧana emes, tabiǧatqa degen qūrmettı därıpteuge baǧyttalǧan maŋyzdy qoǧamdyq şaraǧa ainaldy.
Saltanatty jiynda Aqmola oblysy äkımınıŋ bırınşı orynbasary Eldos Ramazanov öŋırde ekologiialyq baǧyttaǧy jūmystar jüielı türde jüzege asyrylyp jatqanyn atap öttı.
– Biyl memlekettık orman qory aumaǧynda 3 myŋ gektar jerge 20 millionnan astam aǧaş otyrǧyzu josparlanyp otyr. Būl – öŋırdegı ekologiialyq ahualdy jaqsartuǧa baǧyttalǧan jüielı jūmystardyŋ jalǧasy. Tabiǧatty qorǧau – bügıngı buynnyŋ ǧana emes, keleşek ūrpaq aldyndaǧy ortaq jauapkerşılıgı, – dedı Eldos Ramazanov.
Onyŋ aituynşa, «Taza Qazaqstan» bastamasy aiasynda oblysta keŋ auqymdy jūmystar atqarylyp keledı. Myŋdaǧan aula men qoǧamdyq keŋıstıkter tazartylyp, tarihi-mädeni eskertkışterdıŋ aumaǧy abattandyryldy. Ondaǧan myŋ aǧaş köşetı otyrǧyzylyp, qaldyqtardy sūryptau men qaita öŋdeuge baǧyttalǧan jaŋa jobalar qolǧa alynuda. Būl jūmystardyŋ barlyǧy öŋırdıŋ ekologiialyq mädenietın qalyptastyruǧa jäne tūrǧyndardyŋ tabiǧatqa degen jauapkerşılıgın arttyruǧa baǧyttalǧan.
Is-şaraǧa qatysqan Qazaqstan Respublikasy Su resurstary jäne irrigasiia ministrlıgınıŋ Su şaruaşylyǧy komitetınıŋ töraǧasy Arsen Jaqanbaev aksiianyŋ mänı tek būlaqtardy tazalaumen şektelmeitının atap öttı.
– «Būl aksiianyŋ negızgı maqsaty – būlaqtardyŋ közın aşyp, ainalasyn tazartu. "Būlaq körseŋ, közın aş" degen halqymyzdyŋ naqyly beker aitylmaǧan. Būl – ūrpaqtan-ūrpaqqa jalǧasyp kele jatqan dästürımız. Bız sol igı dästürdı bügıngı künı de jalǧastyryp kelemız», – dedı komitet töraǧasy.
Aksiia barysynda jastardyŋ belsendılıgı erekşe közge tüstı. Olar tazalyq jūmystarymen qatar, tabiǧatty qorǧaudyŋ maŋyzyn nasihattap, öz qatarlastaryn ekologiialyq mädeniettı qalyptastyruǧa ündedı.
«Jasyl el» eŋbek jasaǧynyŋ müşesı Nūrgül Tūrabai mūndai bastamalardyŋ tärbielık mänı zor ekenın aitady.
– Tabiǧatty qorǧau är adamnyŋ boiynda jastaiynan qalyptasuy kerek. Sondyqtan mūndai aksiialardyŋ mektep oquşylary men jastar üşın tärbielık maŋyzy öte joǧary. Osyndai şaralarǧa qatysu arqyly ärkım tuǧan jerdıŋ tazalyǧy özınen bastalatynyn tüsınedı, – deidı Nūrgül Tūrabai.
«Möldır būlaq» aksiiasy bügınde tabiǧi su közderın tazartu jūmysy ǧana emes, qoǧamdy ortaq maqsatqa jūmyldyratyn maŋyzdy ekologiialyq qozǧalysqa ainalyp otyr. Mūndai bastamalar adamdardyŋ tabiǧatqa degen közqarasyn özgertıp, tuǧan jerge janaşyrlyqpen qaraudyŋ naqty ülgısın körsetedı.
Burabaidaǧy igı ıs taǧy bır maŋyzdy şyndyqty aiqyn aŋǧartty: tabiǧatty qorǧau – belgılı bır mekemenıŋ nemese erıktılerdıŋ ǧana mındetı emes. Būl – är azamattyŋ kündelıktı ömırlık ūstanymyna ainaluy tiıs ortaq qūndylyq. Al «Möldır būlaq» aksiiasy sol qūndylyqtardy jaŋǧyrtyp, tabiǧat pen qoǧam arasyndaǧy üilesımdı bailanysty nyǧaitatyn igı bastama retınde öz jalǧasyn taba beredı.
