كاسپي قۇبىر كونسورتسيۋمى (كقك) جۇك جونەلتۋشىلەردەن مۇناي قابىلداۋدى جانە نوۆوروسسيسك پورتىنداعى تەڭىز تەرمينالى ارقىلى مۇناي تيەۋدى قايتا باستادى. بۇل تۋرالى قازاقستان رەسپۋبليكاسى ەنەرگەتيكا مينيسترلىگى جاريالادى، دەپ حابارلايدى "ادىرنا".
ۆەدومستۆونىڭ مالىمەتىنشە، قازىرگى ۋاقىتتا مۇناي كقك-نىڭ ەكى قالقىمالى ايلاق قۇرىلعىسى ارقىلى ءبىر مەزگىلدە تيەلىپ جاتىر.
قازىر SEAMAJESTY جانە MILOS تانكەرلەرىنە «تەڭىزشەۆرويل» جشس وندىرگەن مۇناي تيەلۋدە.
مينيسترلىك مۇناي قابىلداۋدىڭ قايتا باستالۋى مۇناي ءوندىرۋشى كومپانيالارعا شيكىزاتتى قۇبىر جۇيەسىنە جەتكىزۋدى جالعاستىرۋعا جانە كقك تەڭىز تەرمينالى ارقىلى ەكسپورتتى قالپىنا كەلتىرۋگە مۇمكىندىك بەرەتىنىن مالىمدەدى.
سونداي-اق تەرمينالداعى جۇمىستار قازىرگى جاعداي ەسكەرىلىپ، بارلىق قاۋىپسىزدىك تالاپتارىن قاتاڭ ساقتاي وتىرىپ جۇرگىزىلىپ جاتقانى اتاپ ءوتىلدى.
مينيسترلىك كقك باسشىلىعىمەن، ءىرى جۇك جونەلتۋشىلەرمەن جانە وزگە دە قاتىسۋشىلارمەن تۇراقتى بايلانىستا ەكەنىن حابارلادى.
«قازاقستان رەسپۋبليكاسى ەنەرگەتيكا مينيسترلىگى جاعدايدى باقىلاۋدى جانە قازاقستاندىق مۇنايدى ودان ءارى تاسىمالداۋدى قامتاماسىز ەتۋگە باعىتتالعان ءىس-قيمىلدى ۇيلەستىرۋدى جالعاستىرادى»، – دەلىنگەن حابارلامادا.
ەسكە سالساق، 20 شىلدەدە كقك تەڭىز تەرمينالى ماڭىندا تانكەرگە ۇشقىشسىز ۇشۋ اپپاراتتارىنىڭ شابۋىلىنان كەيىن مۇناي ەكسپورتىن تيەۋ ۋاقىتشا توقتاتىلعان بولاتىن.
شابۋىل كەزىندە Nordic Zenith, ASIA, NISSOS IOS جانە NELSA تانكەرلەرى تەرمينالدا بولعان. كقك مالىمەتىنشە، بىرنەشە كەمە مۇناي تيەۋ بارىسىندا شابۋىلعا ۇشىراپ، ءورت شىققان. دەگەنمەن ادام شىعىنى مەن مۇنايدىڭ تەڭىزگە توگىلۋىنە جول بەرىلگەن جوق.
كاسپي قۇبىر كونسورتسيۋمى باتىس قازاقستانداعى مۇناي كەن ورىندارىن نوۆوروسسيسك ماڭىنداعى تەڭىز تەرمينالىمەن بايلانىستىرادى. وسى باعىت ارقىلى قازاقستاننىڭ ەكسپورتقا شىعاراتىن مۇنايىنىڭ 80 پايىزدان استامى تاسىمالدانادى. سوندىقتان قۇبىر نەمەسە تەرمينال جۇمىسىنداعى كەز كەلگەن ءۇزىلىس مۇناي ءوندىرىسى مەن الەمدىك نارىققا جەتكىزۋ كولەمىنە تىكەلەي اسەر ەتەدى.
2026 جىلدىڭ ماۋسىم ايىندا تەڭىز كەن ورنىنداعى اپات پەن رەسەي مۇنايىنىڭ كولەمىنىڭ ازايۋىنا بايلانىستى كقك ارقىلى مۇناي ايداۋ كولەمى مامىرمەن سالىستىرعاندا 7 پايىزعا تومەندەگەن بولاتىن.
كونسورتسيۋم قازاقستان مۇنايىن ەكسپورتتاۋدىڭ باستى باعىتى سانالادى. ول ارقىلى تەڭىز، قاشاعان جانە قاراشىعاناق سياقتى ءىرى كەن ورىندارىنىڭ مۇنايى شەتەلگە جونەلتىلەدى.
مۇناي ەكسپورتىنداعى ۋاقىتشا ۇزىلىسكە بايلانىستى قازاقستان مۇناي ءوندىرۋ كولەمىن قىسقارتۋعا ءماجبۇر بولدى.
Reuters اگەنتتىگىنىڭ مالىمەتىنشە، 2026 جىلدىڭ العاشقى جارتىسىندا كقك تەڭىز تەرمينالى ارقىلى 33,362 ملن توننا مۇناي جونەلتىلگەن. وتكەن جىلدىڭ وسى كەزەڭىندە بۇل كورسەتكىش 36,025 ملن توننانى قۇراعان.
كاسپي قۇبىر كونسورتسيۋمىنىڭ ءىرى اكتسيونەرلەرى قاتارىندا رەسەي (31%), قازاقستان (20,75%), Chevron كومپانياسى (15%) جانە بىرقاتار جەكەمەنشىك كومپانيالار بار.
