قازاقستان 2026 جىلى كاسپي قۇبىر كونسورتسيۋمىنداعى ماسەلەلەر مەن تەڭىز كەن ورنىنداعى اپات سالدارىنان شامامەن 6 ملن توننا مۇناي وندىرە الماي قالعان. بۇل تۋرالى 13 قازاندا وتكەن بريفينگتە پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مالىمدەدى، دەپ حابارلايدى «ادىرنا» ءتىلشىسى.
«جىل باسىنداعى تەڭىزدەگى اپات پەن كقك-داعى ماسەلەلەر سالدارىنان شامامەن 6 ملن توننا مۇناي جوعالتتىق. ياعني، بۇل كولەمدە مۇناي وندىرىلمەدى. ناقتىراق ايتقاندا، مۇناي جەر استىندا جاتىر، بىراق ەكونوميكالىق اينالىمعا قاتىسپاي وتىر»، – دەپ ءتۇسىندىردى جۇمانعارين.
سونداي-اق ەنەرگەتيكا ۆيتسە-ءمينيسترى ەرلان اقباروۆ 2026 جىلدىڭ قاڭتار-قىركۇيەك ايلارى ارالىعىندا ەلدە 69,4 ملن توننا مۇناي وندىرىلگەنىن حابارلادى. بۇل 2025 جىلدىڭ سايكەس كەزەڭىندەگى كورسەتكىشتىڭ 91,7 پايىزىنا تەڭ.
وندىرىلمەي قالعان مۇناي كولەمىنىڭ ورنىن تولتىرۋ ءۇشىن بيلىك قاشاعان مەن تەڭىز كەن ورىندارىنداعى جوسپارلى-پروفيلاكتيكالىق جوندەۋ جۇمىستارىن كەيىنگە شەگەرگەن. بۇدان بولەك، مۇناي ءوندىرۋ كولەمىن ارتتىرۋ شارالارى بويىنشا ءىرى جەر قويناۋىن پايدالانۋشىلارمەن كەلىسسوزدەر جۇرگىزىلىپ جاتىر.
2026 جىلدىڭ قورىتىندىسى بويىنشا مۇناي ءوندىرۋ بولجامى – 96 ملن توننا. سالىستىرمالى تۇردە ايتساق، 2025 جىلى قازاقستاندا 99,55 ملن توننا مۇناي وندىرىلگەن.
بۇعان دەيىن ەنەرگەتيكا مينيسترلىگى تەڭىز كەن ورنىنداعى وندىرىستىك اقاۋ مەن كقك ينفراقۇرىلىمىنا جاسالعان شابۋىلداردى ەسكەرە وتىرىپ، 2026 جىلعا ارنالعان مۇناي ءوندىرۋ جوسپارى قايتا قارالعانىن حابارلاعان بولاتىن.
كقك جەلىسى بيىل ۋكراينا تاراپىنان ءجيى درون شابۋىلىنا ۇشىرادى.
