Kaspii qūbyr konsorsiumy (KQK) jük jöneltuşılerden mūnai qabyldaudy jäne Novorossiisk portyndaǧy teŋız terminaly arqyly mūnai tieudı qaita bastady. Būl turaly Qazaqstan Respublikasy Energetika ministrlıgı jariialady, dep habarlaidy "Adyrna".
Vedomstvonyŋ mälımetınşe, qazırgı uaqytta mūnai KQK-nyŋ ekı qalqymaly ailaq qūrylǧysy arqyly bır mezgılde tielıp jatyr.
Qazır SEAMAJESTY jäne MILOS tankerlerıne «Teŋızşevroil» JŞS öndırgen mūnai tielude.
Ministrlık mūnai qabyldaudyŋ qaita bastaluy mūnai öndıruşı kompaniialarǧa şikızatty qūbyr jüiesıne jetkızudı jalǧastyruǧa jäne KQK teŋız terminaly arqyly eksportty qalpyna keltıruge mümkındık beretının mälımdedı.
Sondai-aq terminaldaǧy jūmystar qazırgı jaǧdai eskerılıp, barlyq qauıpsızdık talaptaryn qataŋ saqtai otyryp jürgızılıp jatqany atap ötıldı.
Ministrlık KQK basşylyǧymen, ırı jük jöneltuşılermen jäne özge de qatysuşylarmen tūraqty bailanysta ekenın habarlady.
«Qazaqstan Respublikasy Energetika ministrlıgı jaǧdaidy baqylaudy jäne qazaqstandyq mūnaidy odan ärı tasymaldaudy qamtamasyz etuge baǧyttalǧan ıs-qimyldy üilestırudı jalǧastyrady», – delıngen habarlamada.
Eske salsaq, 20 şıldede KQK teŋız terminaly maŋynda tankerge ūşqyşsyz ūşu apparattarynyŋ şabuylynan keiın mūnai eksportyn tieu uaqytşa toqtatylǧan bolatyn.
Şabuyl kezınde Nordic Zenith, ASIA, NISSOS IOS jäne NELSA tankerlerı terminalda bolǧan. KQK mälımetınşe, bırneşe keme mūnai tieu barysynda şabuylǧa ūşyrap, ört şyqqan. Degenmen adam şyǧyny men mūnaidyŋ teŋızge tögıluıne jol berılgen joq.
Kaspii qūbyr konsorsiumy Batys Qazaqstandaǧy mūnai ken oryndaryn Novorossiisk maŋyndaǧy teŋız terminalymen bailanystyrady. Osy baǧyt arqyly Qazaqstannyŋ eksportqa şyǧaratyn mūnaiynyŋ 80 paiyzdan astamy tasymaldanady. Sondyqtan qūbyr nemese terminal jūmysyndaǧy kez kelgen üzılıs mūnai öndırısı men älemdık naryqqa jetkızu kölemıne tıkelei äser etedı.
2026 jyldyŋ mausym aiynda Teŋız ken ornyndaǧy apat pen Resei mūnaiynyŋ kölemınıŋ azaiuyna bailanysty KQK arqyly mūnai aidau kölemı mamyrmen salystyrǧanda 7 paiyzǧa tömendegen bolatyn.
Konsorsium Qazaqstan mūnaiyn eksporttaudyŋ basty baǧyty sanalady. Ol arqyly Teŋız, Qaşaǧan jäne Qaraşyǧanaq siiaqty ırı ken oryndarynyŋ mūnaiy şetelge jöneltıledı.
Mūnai eksportyndaǧy uaqytşa üzılıske bailanysty Qazaqstan mūnai öndıru kölemın qysqartuǧa mäjbür boldy.
Reuters agenttıgınıŋ mälımetınşe, 2026 jyldyŋ alǧaşqy jartysynda KQK teŋız terminaly arqyly 33,362 mln tonna mūnai jöneltılgen. Ötken jyldyŋ osy kezeŋınde būl körsetkış 36,025 mln tonnany qūraǧan.
Kaspii qūbyr konsorsiumynyŋ ırı aksionerlerı qatarynda Resei (31%), Qazaqstan (20,75%), Chevron kompaniiasy (15%) jäne bırqatar jekemenşık kompaniialar bar.
