قازاقستاننىڭ مادەنيەت قايراتكەرى، «ەرەن ەڭبەگى ءۇشىن» مەدالىنىڭ يەگەرى، تەاتر جانە كينو اكتريساسى بيجامال كەمالوۆا ۇزاققا سوزىلعان اۋىر ناۋقاستان كەيىن دۇنيەدەن ءوتتى. قارالى حاباردى اكتريسا ۇزاق جىلدار بويى ەڭبەك ەتكەن ساكەن سەيفۋللين اتىنداعى قاراعاندى وبلىستىق اكادەميالىق قازاق دراما تەاترى مالىمدەدى، دەپ حابارلايدى "ادىرنا".
تەاتر ۇجىمىنىڭ حابارلاۋىنشا، بيجامال كەمالوۆا شىعارماشىلىق جولىن 1980-جىلداردىڭ باسىندا قاراعاندىداعى قازاق دراما تەاترىندا باستاپ، بۇكىل عۇمىرىن ۇلتتىق تەاتر ونەرىنە ارنادى. ول قازاقستان رەسپۋبليكاسىنىڭ مادەنيەت قايراتكەرى اتانىپ، «ەرەن ەڭبەگى ءۇشىن» مەملەكەتتىك مەدالىمەن ماراپاتتالعان. سونىمەن قاتار، استاناداعى قاليبەك قۋانىشباەۆ اتىنداعى قازاق ۇلتتىق مۋزىكالىق-دراما تەاترىنىڭ قالىپتاسۋىنا دا ۇلەس قوسقان تەاتر ارداگەرلەرىنىڭ ءبىرى بولدى.
ارىپتەستەرى ونىڭ قازاق ساحناسىندا سان الۋان بەينەنى سومداپ، قازاق ايەلدەرىنىڭ، انالاردىڭ جانە اجەلەردىڭ بولمىسىن ەرەكشە شەبەرلىكپەن جەتكىزگەنىن اتاپ ءوتتى.
«وزىندىك اكتەرلىك قولتاڭباسى بار ونەر يەسى تەاترىمىزدىڭ ماقتانىشى ءارى جاس بۋىننىڭ اقىلشى ۇستازى بولدى. مارقۇمنىڭ يمانى سالامات بولىپ، جانى ءجانناتتا شالقىسىن. وتباسى مەن تۋعان-تۋىستارىنا قايعىرىپ كوڭىل ايتامىز»، – دەلىنگەن تەاتردىڭ كوڭىل ايتۋ حابارلاماسىندا.
بيجامال كەمالوۆا ساحنادا كوپتەگەن جارقىن رولدەردى سومدادى. ولاردىڭ قاتارىندا «دوسىمنىڭ ۇيلەنۋى» قويىلىمىنداعى بيعانىم، «قاراگوزدەگى» ءمورجان، «عاشىقتىڭ ءتىلى» سپەكتاكلىندەگى سۇيىمقان، «قايران جاس داۋرەندەگى» ۆورونكوۆا، «اققۋ سەزىمدەگى» اقديدار، «مۋسە جوردانداعى» شاحرابانۋ جانە «تانگە تۇسكەن راۋشانگۇل» قويىلىمىنداعى ميسس يورك وبرازدارى بار.
بيجامال دالابايقىزى كەمالوۆا 1958 جىلدىڭ 16 جەلتوقسانىندا دۇنيەگە كەلگەن. 1983 جىلى الماتى مەملەكەتتىك تەاتر جانە كوركەمسۋرەت ينستيتۋتىن «دراما تەاترى مەن كينو اكتەرى» ماماندىعى بويىنشا تامامداعان. كەيىن ۇزاق جىلدار بويى ساكەن سەيفۋللين اتىنداعى قاراعاندى وبلىستىق اكادەميالىق قازاق دراما تەاترىندا ەڭبەك ەتىپ، جەتەكشى اكتريسالاردىڭ بىرىنە اينالدى.
