Qazaqstannyŋ mädeniet qairatkerı, «Eren eŋbegı üşın» medalınıŋ iegerı, teatr jäne kino aktrisasy Bijamal Kemalova ūzaqqa sozylǧan auyr nauqastan keiın dünieden öttı. Qaraly habardy aktrisa ūzaq jyldar boiy eŋbek etken Säken Seifullin atyndaǧy Qaraǧandy oblystyq akademiialyq qazaq drama teatry mälımdedı, dep habarlaidy "Adyrna".
Teatr ūjymynyŋ habarlauynşa, Bijamal Kemalova şyǧarmaşylyq jolyn 1980-jyldardyŋ basynda Qaraǧandydaǧy qazaq drama teatrynda bastap, bükıl ǧūmyryn ūlttyq teatr önerıne arnady. Ol Qazaqstan Respublikasynyŋ mädeniet qairatkerı atanyp, «Eren eŋbegı üşın» memlekettık medalımen marapattalǧan. Sonymen qatar, Astanadaǧy Qalibek Quanyşbaev atyndaǧy Qazaq ūlttyq muzykalyq-drama teatrynyŋ qalyptasuyna da üles qosqan teatr ardagerlerınıŋ bırı boldy.
Ärıptesterı onyŋ qazaq sahnasynda san aluan beinenı somdap, qazaq äielderınıŋ, analardyŋ jäne äjelerdıŋ bolmysyn erekşe şeberlıkpen jetkızgenın atap öttı.
«Özındık akterlık qoltaŋbasy bar öner iesı teatrymyzdyŋ maqtanyşy ärı jas buynnyŋ aqylşy ūstazy boldy. Marqūmnyŋ imany salamat bolyp, jany jännatta şalqysyn. Otbasy men tuǧan-tuystaryna qaiǧyryp köŋıl aitamyz», – delıngen teatrdyŋ köŋıl aitu habarlamasynda.
Bijamal Kemalova sahnada köptegen jarqyn rölderdı somdady. Olardyŋ qatarynda «Dosymnyŋ üilenuı» qoiylymyndaǧy Biǧanym, «Qaragözdegı» Mörjan, «Ǧaşyqtyŋ tılı» spektaklındegı Sūiımqan, «Qairan jas däurendegı» Voronkova, «Aqqu sezımdegı» Aqdidar, «Muse Jordandaǧy» Şahrabanu jäne «Tänge tüsken rauşangül» qoiylymyndaǧy Miss Iork obrazdary bar.
Bijamal Dalabaiqyzy Kemalova 1958 jyldyŋ 16 jeltoqsanynda düniege kelgen. 1983 jyly Almaty memlekettık teatr jäne körkemsuret institutyn «drama teatry men kino akterı» mamandyǧy boiynşa tämamdaǧan. Keiın ūzaq jyldar boiy Säken Seifullin atyndaǧy Qaraǧandy oblystyq akademiialyq qazaq drama teatrynda eŋbek etıp, jetekşı aktrisalardyŋ bırıne ainaldy.
