سوڭعى ءتورت جىلدا قازاقستاندا جولاۋشىلار پويىزدارىنىڭ پاركى جاڭارتىلىپ، 418 جاڭا ۆاگون ساتىپ الىندى. جىلجىمالى قۇرامدى جاڭعىرتۋ جۇمىستارى جالعاسىپ جاتىر. بۇل تۋرالى «قازاقستان تەمىر جولى» ۇلتتىق كومپانياسى ايتتى، دەپ حابارلايدى «ادىرنا» ءتىلشىسى Kazinform-عا سىلتەمە جاساپ.
جىلجىمالى قۇرامدى جاڭارتۋ ىشكى جانە حالىقارالىق باعىتتاردى دا قامتىعان.
«قازىرگى ۋاقىتتا جولاۋشىلار ۆاگوندارى پاركى 2 159 بىرلىكتى قۇرايدى. 2022–2026 جىلدار ارالىعىندا 418 جاڭا جولاۋشىلار ۆاگونى ساتىپ الىنىپ، ولار قازاقستان ىشىندەگى جانە حالىقارالىق باعىتتارداعى بىرقاتار مارشرۋتتارعا جىبەرىلدى»، – دەپ مالىمدەدى «قازاقستان تەمىر جولى» ۇك ءباسپاسوز قىزمەتى.
كومپانيا الداعى ۋاقىتتا دا پاركتى جاڭارتۋدى جوسپارلاپ وتىر. بيىل تاعى 131 جولاۋشىلار ۆاگونىن ساتىپ الۋ تۋرالى كەلىسىمشارت جاسالعان. ولاردى جەتكىزۋ كەلەسى جىلدىڭ سوڭىنا دەيىن جۇزەگە اسىرىلادى. سونىمەن قاتار 2030 جىلعا دەيىن تاعى 557 جوعارى تەحنولوگيالىق ۆاگون جەتكىزىلەدى دەپ كۇتىلۋدە.
ودان بولەك، جاڭا لوكوموتيۆتەردى جەتكىزۋ جونىندە دە كەلىسىمدەر جاسالعان. قازىرگى تاڭدا ينۆەنتارلىق پاركتە 1 813 لوكوموتيۆ بار، ولاردىڭ توزۋ دەڭگەيى 46,2 پايىزدى قۇرايدى. كومپانيا الداعى جىلدارى تەحنيكانى ەداۋىر جاڭارتۋدى كوزدەپ وتىر.
«2026–2036 جىلدار ارالىعىندا 1 082 لوكوموتيۆ ساتىپ الۋ جوسپارلانعان. بۇل توزۋ دەڭگەيىن 29,8 پايىزعا دەيىن تومەندەتۋگە مۇمكىندىك بەرەدى. 2026 جىلدىڭ باسىنان بەرى پارك 144 زاماناۋي تەحنيكامەن تولىقتىرىلدى»، – دەلىنگەن حابارلامادا.
كومپانيا وكىلدەرىنىڭ ايتۋىنشا، تەحنيكا مەن ينفراقۇرىلىمدى جاڭارتۋ جولاۋشىلار اعىنىنىڭ ارتۋىنا بايلانىستى قاجەت بولىپ وتىر. 2026 جىلدىڭ العاشقى التى ايىنىڭ قورىتىندىسى بويىنشا جولاۋشىلار اينالىمى 5 ملرد 544 ملن جولاۋشى-شاقىرىمدى قۇراعان. بۇل وتكەن جىلدىڭ سايكەس كەزەڭىمەن سالىستىرعاندا 2,3 پايىزعا جوعارى.
كومپانيا تەمىرجول تاسىمالىنا سۇرانىس الداعى جىلدارى دا وسەدى دەپ بولجاپ وتىر.
«2027–2030 جىلدارعا ارنالعان جوسپار بويىنشا جولاۋشىلار اينالىمىن كەزەڭ-كەزەڭىمەن ارتتىرۋ كوزدەلگەن. اتاپ ايتقاندا، 2027 جىلى كورسەتكىش 12 ملرد 58 ملن جولاۋشى-شاقىرىمعا، 2028 جىلى – 12 ملرد 353 ميلليونعا، 2029 جىلى – 12 ملرد 780 ميلليونعا، ال 2030 جىلى 13 ملرد 279 ملن جولاۋشى-شاقىرىمعا جەتەدى دەپ جوسپارلانىپ وتىر»، – دەپ حابارلادى كومپانيانىڭ ءباسپاسوز قىزمەتى.
كومپانيادا جولاۋشىلار ۆاگوندارى مەن لوكوموتيۆتەر پاركىن جاڭارتۋ تاسىمال كولەمىنىڭ تۇراقتى ءوسۋىن قامتاماسىز ەتىپ، جولاۋشىلارعا كورسەتىلەتىن قىزمەت ساپاسىن ارتتىرۋعا مۇمكىندىك بەرەتىنىن اتاپ ءوتتى.
