تاجىكستاننىڭ ءبىلىم جانە عىلىم مينيسترلىگى اتا-بابا جازۋىن وقىتۋ باعدارلاماسىن قايتا قاراۋ جۇمىستارىن باستادى، دەپ حابارلايدى "ادىرنا" ءتىلشىسى.
جەرگىلىكتى باق دەرەگىنشە، بۇل ماقساتتا ارنايى جۇمىس توبى قۇرىلدى.
مۇنداي شەشىم ەل پرەزيدەنتى ەمومالي راحمون 29 مامىردا ۇكىمەت وتىرىسىندا بەرگەن تاپسىرمادان كەيىن قابىلداندى. مەملەكەت باسشىسى اري تاريحى مەن مادەنيەتىن زەردەلەۋ جانە ناسيحاتتاۋ اياسىندا ءبىلىم بەرۋ جۇيەسىندە پارسى ءتىلىن وقىتۋدىڭ ساپاسىن ارتتىرۋدى تاپسىرعان.
ءبىلىم جانە عىلىم ءمينيسترى راحيم سايدزودا قازىرگى تاڭدا ماماندار وقۋ باعدارلاماسىنا ەنگىزىلەتىن وزگەرىستەردى زەردەلەپ جاتقانىن مالىمدەدى.
قازىر اتا-بابا جازۋى 7 جانە 8-سىنىپ وقۋشىلارىنا اپتاسىنا ەكى ساعاتتان وقىتىلادى. مينيسترلىك باعدارلامانى جەتىلدىرۋ مۇمكىندىگىن قاراستىرىپ جاتىر، الايدا ناقتى وزگەرىستەر ازىرگە جاريالانعان جوق.
مينيستر بۇل باستاما جاڭا ءتىلدى ەنگىزۋدى كوزدەمەيتىنىن ەرەكشە اتاپ ءوتتى.
«بۇل – باسقا ءتىل ەمەس، تاجىك ءتىلى. تەك ونى وسى جازۋ ۇلگىسىمەن مەڭگەرۋ قاجەت»، – دەدى ول.
ءوز كەزەگىندە تاجىكستاننىڭ ءتىل جانە تەرمينولوگيا كوميتەتىنىڭ توراعاسى ساحيدود راحماتۋللوزودا كوميتەت قىزمەتكەرلەرى اتا-بابا جازۋىن ەركىن مەڭگەرگەنىن جانە ونى ناسيحاتتاۋ جۇمىستارىن جۇرگىزىپ جاتقانىن ايتتى.
ونىڭ سوزىنشە، تاجىك حالقىنىڭ 1200 جىلدان استام جازبا تاريحى وسى جازۋمەن بايلانىستى. سوندىقتان اتا-بابا جازۋىن ءبىلۋ ەلدىڭ تاريحي ءارى ادەبي مۇراسىمەن تەرەڭىرەك تانىسۋعا مۇمكىندىك بەرەدى. سونىمەن قاتار ول بۇل جازۋدى كەز كەلگەن ادام جاسىنا قاراماستان مەڭگەرە الاتىنىن جەتكىزدى.
