قوستاناي وبلىسىندا «Qostanai Dala Festivali» اياسىندا «Jańa Dala / Green Day – 2026» حالىقارالىق كورمە-دەمونستراتسياسى ءوتىپ جاتىر. اگروونەركاسىپ كەشەنىندەگى ەڭ ءىرى سالالىق ءىس-شارالاردىڭ ءبىرى سانالاتىن فەستيۆالگە ەلىمىزدىڭ ءار وڭىرىنەن جانە شەتەلدەن كەلگەن فەرمەرلەر، اگروبيزنەس وكىلدەرى، عالىمدار، ينۆەستورلار، مەملەكەتتىك ورگانداردىڭ باسشىلارى مەن اۋىل شارۋاشىلىعى تەحنيكاسىن ءوندىرۋشى كومپانيالار قاتىسۋدا.
فەستيۆالدىڭ سالتاناتتى اشىلۋىنا قوستاناي وبلىسىنىڭ اكىمى قۇمار اقساقالوۆ پەن قازاقستان رەسپۋبليكاسىنىڭ اۋىل شارۋاشىلىعى ءمينيسترى ايداربەك ساپاروۆ قاتىستى.
اۋىل شارۋاشىلىعى ءمينيسترى ايداربەك ساپاروۆ ءوز سوزىندە مەملەكەت باسشىسى اگروونەركاسىپ كەشەنىن جوعارى تەحنولوگيالى ءارى باسەكەگە قابىلەتتى سالاعا اينالدىرۋعا باسىمدىق بەرىپ وتىرعانىن اتاپ ءوتتى.
«مەملەكەتتىك قولداۋ شارالارىنىڭ ناتيجەسىندە اگرارلىق سالا سوڭعى ءۇش جىل قاتارىنان تۇراقتى ءوسىم كورسەتىپ كەلەدى. قوستانايداعى اگروفەستيۆال اۋىل شارۋاشىلىعى تاۋارىن وندىرۋشىلەرگە الەمدىك تاجىريبەمەن تانىسىپ، زاماناۋي تەحنولوگيالاردى مەڭگەرۋگە جانە جاڭا ىسكەرلىك بايلانىستار ورناتۋعا مۇمكىندىك بەرەتىن ماڭىزدى الاڭ»، – دەدى مينيستر.
ءوز كەزەگىندە قوستاناي وبلىسىنىڭ اكىمى قۇمار اقساقالوۆ ءوڭىردىڭ اگرارلىق الەۋەتىنە توقتالىپ، بيىل اگروونەركاسىپ كەشەنىن قولداۋعا 275 ملرد تەڭگە بولىنگەنىن، ال سوڭعى بەس جىلدا قارجىلاندىرۋ كولەمى 3,6 ەسەگە ارتقانىن ايتتى. ونىڭ سوزىنشە، مۇنداي اۋقىمدى فەستيۆال الداعى ۋاقىتتا قوستانايدىڭ جاڭا برەندىنە اينالۋى ءتيىس.
فەستيۆال بارىسىندا اگروونەركاسىپ كەشەنىنىڭ ۇزدىك قىزمەتكەرلەرى ماراپاتتالىپ، سالانىڭ دامۋىنا ۇلەس قوسقان ماماندارعا «ەڭبەك ارداگەرى»، «اۋىل شارۋاشىلىعى سالاسىنىڭ ۇزدىگى» توسبەلگىلەرى، قۇرمەت گراموتالارى مەن العىس حاتتار تابىستالدى.
«Jańa Dala / Green Day – 2026» كورمەسىنىڭ باستى ەرەكشەلىگى – اۋىل شارۋاشىلىعىنداعى يننوۆاتسيالىق تەحنولوگيالاردى تاجىريبە جۇزىندە كورسەتۋ. كورمە الاڭىندا زاماناۋي تراكتورلار، استىق جينايتىن كومبايندار، ەگىس كەشەندەرى، توپىراق وڭدەۋ تەحنيكالارى، وزدىگىنەن جۇرەتىن بۇرىككىشتەر، اگرودروندار، دالمە-ءدال ەگىنشىلىككە ارنالعان تسيفرلىق شەشىمدەر مەن وزگە دە وزىق تەحنولوگيالار تانىستىرىلۋدا. سونىمەن قاتار سەلەكتسيالىق تاناپتار، اسىل تۇقىمدى مال كورمەلەرى مەن اۋىل شارۋاشىلىعى داقىلدارىنىڭ جاڭا سۇرىپتارى كوپشىلىك نازارىنا ۇسىنىلدى.
فەستيۆالدىڭ ىسكەرلىك باعدارلاماسى اياسىندا اۋىل شارۋاشىلىعىن تسيفرلاندىرۋ، ۆەتەريناريالىق قاۋىپسىزدىك، اگرارلىق عىلىم جانە سالانىڭ دامۋ پەرسپەكتيۆالارىنا ارنالعان كونفەرەنتسيالار، ساراپشىلىق پىكىرتالاستار مەن تاجىريبە الماسۋ كەزدەسۋلەرى ۇيىمداستىرىلۋدا. سونداي-اق قازاقستاننىڭ سولتۇستىك وڭىرلەرى ۆەتەريناريا ماماندارىنىڭ II رەسپۋبليكالىق سلەتى ءوتىپ، سالا ماماندارى ءوزارا تاجىريبە بولىسۋدە.
باعدارلاما اياسىندا كەلۋشىلەر «قوستاناي وبلىسىنىڭ ەڭ اۋىر بۇقاسى» بايقاۋىن، ء«بىر اۋىل – ءبىر ءونىم» كورمەسىن، اۋىل شارۋاشىلىعى دروندارىنىڭ كورسەتىلىمىن، اۋىل شارۋاشىلىعى تەحنيكاسىنىڭ دەمونستراتسياسىن جانە «قازاگروقارجى» اق ۇيىمداستىرعان جاڭا تەحنيكالاردى سالتاناتتى تابىستاۋ ءراسىمىن تاماشالاي الادى.
فەستيۆالدىڭ مادەني-تانىمدىق بولىگى دە مازمۇندى ۇيىمداستىرىلعان. قوناقتار ءۇشىن قوستاناي وبلىسىنىڭ 90 جىلدىعىنا ارنالعان ەتنواۋىل جۇمىس ىستەپ، وندا ءوڭىردىڭ اۋدان-قالالارى ۇلتتىق داستۇرلەرى مەن مادەنيەتىن تانىستىرۋدا. سونىمەن قاتار ۇلتتىق سپورت ويىندارى، قولونەر كورمەلەرى، گاسترونوميالىق ايماقتار، Agro Fashion Week Qostanay ءسان كورسەتىلىمى، Qostanay dala games سپورتتىق باعدارلاماسى، تۋريستىك الەۋەت كورمەسى، اۋىل شارۋاشىلىعى ماماندىقتارىنىڭ تانىستىرىلىمى جانە بالالارعا ارنالعان ينتەراكتيۆتى ويىن الاڭدارى ۇيىمداستىرىلعان.
فەستيۆال الداعى كۇندەرى دە ءوز جۇمىسىن جالعاستىرادى. قاتىسۋشىلاردى جاڭا كورمەلەر، ىسكەرلىك كەزدەسۋلەر مەن مادەني باعدارلامالار كۇتۋدە. ال ءۇش كۇنگە سوزىلاتىن اۋقىمدى شارانىڭ قورىتىندىسى مەرەكەلىك گالا-كونتسەرتپەن تۇيىندەلمەك. جابىلۋ سالتاناتىندا قازاقستاندىق ەسترادا جۇلدىزدارى ونەر كورسەتىپ، كورەرمەندەرگە اسەرلى مۋزىكالىق شوۋ مەن كوتەرىڭكى كوڭىل كۇي سىيلايدى. وسىلايشا، «Qostanai Dala Festivali» اگروونەركاسىپ سالاسىنىڭ زاماناۋي جەتىستىكتەرىن عانا ەمەس، ۇلتتىق مادەنيەت پەن ءوڭىردىڭ تۋريستىك الەۋەتىن دە دارىپتەيتىن حالىقارالىق دەڭگەيدەگى ماڭىزدى الاڭ رەتىندە ءوز مارتەبەسىن ايقىنداپ كەلەدى.
