الماتى قالاسىنىڭ المالى اۋداندىق سوتى «قازتاگ» اقپارات اگەنتتىگىنىڭ باسشىلارىنا قاتىستى قىلمىستىق ءىس بويىنشا ۇكىم شىعاردى، دەپ حابارلايدى "ادىرنا" ۇلتتىق پورتالى.
سوت ۇكىمىمەن اگەنتتىكتىڭ باس ديرەكتورى اسەت ماتاەۆ قىزمەتتىك مىندەتتەرىنە ادال قاراماۋ جانە بۇزاقىلىق جاساعانى ءۇشىن كىنالى دەپ تانىلىپ، 3 جىل 6 اي مەرزىمگە باس بوستاندىعىن شەكتەۋ جازاسىنا كەسىلدى. سونداي-اق وعان ءۇش جىل بويى جۋرناليستىك قىزمەتپەن اينالىسۋعا تىيىم سالىندى.
ال اگەنتتىكتىڭ باس رەداكتورى ءامىر قاسەنوۆ جالعان اقپارات تاراتقانى ءۇشىن كىنالى دەپ تانىلىپ، راقىمشىلىق تۋرالى زاڭدى ەسكەرە وتىرىپ، 1 جىل 3 اي مەرزىمگە باس بوستاندىعىن شەكتەۋ جازاسىن الدى. وعان بەس جىل بويى جۋرناليستىك قىزمەتپەن اينالىسۋعا تىيىم سالىندى. ءىس بويىنشا تاعى ءبىر ايىپتالۋشى جاننا قاپاروۆا دا كىنالى دەپ تانىلدى. الايدا راقىمشىلىققا بايلانىستى وعان تاعايىندالعان جازا تولىق قىسقارتىلدى.
سونىمەن قاتار سوت اسەت ماتاەۆ، ءامىر قاسەنوۆ جانە جاننا قاپاروۆادان «فريدوم فينانس» كومپانياسىنىڭ پايداسىنا 165,4 ميلليون تەڭگە ماتەريالدىق شىعىندى، 36,3 ميلليون تەڭگە كولەمىندەگى سوت شىعىندارىن جانە 4,9 ميلليون تەڭگە مەملەكەتتىك باجدى ورتاق تارتىپپەن ءوندىرۋ تۋرالى شەشىم شىعاردى.
سوت بارىسىندا سۋديا اسەت ماتاەۆ پەن ءامىر قاسەنوۆكە مەدەۋ اۋداندىق سوتىنىڭ جاريالانعان ماتەريالداردى الىپ تاستاۋ تۋرالى شەشىمى ورىندالماعان جاعدايدا قىلمىستىق جاۋاپكەرشىلىك كوزدەلۋى مۇمكىن ەكەنىن ەسكەرتتى. ۇكىم زاڭدى كۇشىنە ەنگەن جوق. قورعاۋشى تاراپ ونى الماتى قالالىق سوتىنا اپەللياتسيالىق تارتىپپەن شاعىمداناتىنىن مالىمدەدى.
قىلمىستىق ءىس «فريدوم فينانس» كومپانياسىنىڭ ارىزىنان كەيىن قوزعالعان. تەرگەۋ مالىمەتىنشە، 2025 جىلى «قازتاگ» اگەنتتىگى كومپانيا مەن ونىڭ نەگىزىن قالاۋشى تيمۋر تۇرلوۆتىڭ قىزمەتىنە قاتىستى 250-دەن استام ماتەريال جاريالاعان. كومپانيا جاريالانعان ايىپتاۋلاردى جوققا شىعارعان.
بۇعان دەيىن بىرقاتار حالىقارالىق قۇقىق قورعاۋ ۇيىمدارى، ونىڭ ىشىندە «شەكاراسىز تىلشىلەر» ۇيىمى (RSF), اگەنتتىك باسشىلارىنا قاتىستى قىلمىستىق قۋدالاۋعا الاڭداۋشىلىق بىلدىرگەن ەدى.
