ماسكەۋدە ورنالاسقان كۋدرين الاڭىنداعى مەيرامحانادا جارىلىس بولدى، دەپ حابارلايدى “ادىرنا” ءتىلشىسى.
جارىلىس سالدارىنان ءۇش ادام قازا تاۋىپ، 21 ادام جاراقات الدى. بۇل تۋرالى رەسەيدىڭ ۇلتتىق انتيتەررورلىق كوميتەتى حابارلاعان.
ۆەدومستۆونىڭ مالىمەتىنشە، وقيعا قولدان جاسالعان جارىلعىش قۇرىلعىنىڭ ىسكە قوسىلۋىنان بولعان. الدىن الا اقپارات بويىنشا، جارىلعىش زاتتى الىپ جۇرگەن ايەل قۇرىلعىنى مەيرامحاناعا كىرگىزبەك بولعان. سالدارىنان قۇرىلعى سىرتتا جارىلعان.
قازا تاپقاندار قاتارىندا جارىلعىش قۇرىلعىنى الىپ جۇرگەن ايەل، ونى عيماراتقا كىرگىزبەگەن كۇزەت قىزمەتكەرى جانە ءبىر كەلۋشى بار. زارداپ شەككەندەردىڭ ناقتى سانى ءارتۇرلى دەرەككوزدەردە وزگەشە كورسەتىلگەنىمەن، ۇلتتىق انتيتەررورلىق كوميتەت 21 ادامنىڭ جارالانعانىن حابارلادى.
رەسەيلىك باق-تىڭ حابارلاۋىنشا، جارىلىس Balzi Rossi مەيرامحاناسىنىڭ ماڭىندا، جازعى ۆەرانداعا كىرەبەرىس تۇستا بولعان. سول ۋاقىتتا وندا جەكە ءىس-شارا ءوتىپ جاتقان. كەيبىر باسىلىمدار كەشكە شامامەن 50 ادام قاتىسقانىن حابارلادى.
وقيعادان كەيىن الەۋمەتتىك جەلىدە مەيرامحانا ىشىندە گاز باللونى جارىلعانى تۋرالى اقپارات تارادى. الايدا مەيرامحانانىڭ باس اسپازى كارلو الفيەري بۇل مالىمەتتى جوققا شىعارىپ، جارىلىس عيماراتتىڭ سىرتىندا بولعانىن ايتتى.
قازىر قۇقىق قورعاۋ ورگاندارى وقيعانىڭ بارلىق ءمان-جايىن انىقتاپ جاتىر. قازا تاپقاندار مەن زارداپ شەككەندەردىڭ جەكە تۇلعالارى ازىرگە جاريالانعان جوق.
