كاسپي تۇبىندەگى كابەل. قازاقستان مەن ازەربايجان تسيفرلىق كوپىر سالدى

ەلىمىزدە ترانسكاسپي سۋاستى تالشىقتى-وپتيكالىق بايلانىس جەلىسى قۇرىلىسىنىڭ نەگىزگى كەزەڭى اياقتالدى. بۇل تۋرالى بۇگىن، 5 تامىزدا پرەمەر-ءمينيستردىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.

سۋاستى كابەلى قازاقستان جاعالاۋىنا ءساتتى جەتكىزىلىپ، «قازاقتەلەكوم» اق مەن AzerTelecom International كومپانيالارى جۇزەگە اسىرىپ جاتقان جوبانىڭ ەڭ كۇردەلى بولىگى اياقتالعان. اقتاۋ – سۇمعايىت باعىتى بويىنشا وتەتىن جاڭا مارشرۋت قازاقستان مەن ازەربايجاننىڭ تسيفرلىق ينفراقۇرىلىمىن بىرىكتىرىپ، ازيا مەن ەۋروپا اراسىنداعى دەرەكتەردى جوعارى جىلدامدىقپەن تىكەلەي جەتكىزەتىن دالىزگە اينالماق. جوبا حالىقارالىق بايلانىس سەنىمدىلىگىن ارتتىرىپ، ەكى ەلدىڭ ترانزيتتىك الەۋەتىن كۇشەيتەدى.

اتالعان جوبا 2025 جىلى باستالعان بولاتىن. ماماندار ينجەنەرلىك ىزدەنىستەر جۇرگىزىپ، وڭتايلى باعىتتى ايقىنداپ، كابەلدى سىناقتان وتكىزگەن. سۋاستى كابەلىن توسەۋ جۇمىستارى 2026 جىلدىڭ شىلدە ايىندا باستالعان.

قۇرىلىس تاۋلىك بويى سۋ سىيىمدىلىعى 20 مىڭ توننادان اساتىن مامانداندىرىلعان كەمەنىڭ كومەگىمەن جۇرگىزىلىپ، جوباعا 70 مامان تارتىلعان.

ء«بىز ترانسكاسپي سۋاستى تالشىقتى-وپتيكالىق بايلانىس جەلىسىن سالۋدىڭ ەڭ كۇردەلى كەزەڭىن – كاسپي تەڭىزىنىڭ تابانى ارقىلى كابەل توسەۋ جۇمىستارىن اياقتادىق. جاڭا مارشرۋت قازاقستاننىڭ الەمدىك دەرەكتەردى بەرۋ جەلىلەرىمەن تسيفرلىق بايلانىسىن كۇشەيتىپ، جاساندى ينتەللەكت، “بۇلتتى” تەحنولوگيالار جانە زاماناۋي دەرەكتەردى وڭدەۋ ورتالىقتارىن ودان ءارى دامىتۋدىڭ نەگىزىن قالايدى. تسيفرلىق ينفراقۇرىلىمدى جۇيەلى تۇردە دامىتا وتىرىپ، قازاقستان ەۋروپا مەن ازيا اراسىنداعى ستراتەگيالىق تسيفرلىق كوپىر رەتىندەگى ۇستانىمىن نىعايتا تۇسۋدە», — دەدى پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ.

قازىرگى ۋاقىتتا كابەلدى جاعالاۋداعى ينفراقۇرىلىمعا قوسۋ جۇمىستارى جۇرگىزىلۋدە. كۇزدە جەرۇستى ينفراقۇرىلىمىنىڭ قۇرىلىسىن اياقتاپ، ىسكە قوسۋ-باپتاۋ جۇمىستارىن جانە جۇيەنى كەشەندى تەستىلەۋدى اياقتاۋ جوسپارلانىپ وتىر.

ماگيسترالدى سالۋ جانە ونى كەيىننەن پايدالانۋ جۇمىستارىنا «قازاقتەلەكوم» اق مەن AzerTelecom International كومپانيالارىنىڭ بىرلەسكەن كاسىپورنى – CaspiLink B.V. جاۋاپتى. جوبا بيۋدجەت قاراجاتىن تارتپاي، وپەراتورلاردىڭ ءوز قاراجاتى ەسەبىنەن جۇزەگە اسىرىلۋدا.