Elımızde Transkaspii suasty talşyqty-optikalyq bailanys jelısı qūrylysynyŋ negızgı kezeŋı aiaqtaldy. Būl turaly bügın, 5 tamyzda Premer-ministrdıŋ baspasöz qyzmetı jazdy, dep habarlaidy «Adyrna» tılşısı.
Suasty kabelı Qazaqstan jaǧalauyna sättı jetkızılıp, «Qazaqtelekom» AQ men AzerTelecom International kompaniialary jüzege asyryp jatqan jobanyŋ eŋ kürdelı bölıgı aiaqtalǧan. Aqtau – Sūmǧaiyt baǧyty boiynşa ötetın jaŋa marşrut Qazaqstan men Äzerbaijannyŋ sifrlyq infraqūrylymyn bırıktırıp, Aziia men Europa arasyndaǧy derekterdı joǧary jyldamdyqpen tıkelei jetkızetın dälızge ainalmaq. Joba halyqaralyq bailanys senımdılıgın arttyryp, ekı eldıŋ tranzittık äleuetın küşeitedı.
Atalǧan joba 2025 jyly bastalǧan bolatyn. Mamandar injenerlık ızdenıster jürgızıp, oŋtaily baǧytty aiqyndap, kabeldı synaqtan ötkızgen. Suasty kabelın töseu jūmystary 2026 jyldyŋ şılde aiynda bastalǧan.
Qūrylys täulık boiy su syiymdylyǧy 20 myŋ tonnadan asatyn mamandandyrylǧan kemenıŋ kömegımen jürgızılıp, jobaǧa 70 maman tartylǧan.
«Bız Transkaspii suasty talşyqty-optikalyq bailanys jelısın saludyŋ eŋ kürdelı kezeŋın – Kaspii teŋızınıŋ tabany arqyly kabel töseu jūmystaryn aiaqtadyq. Jaŋa marşrut Qazaqstannyŋ älemdık derekterdı beru jelılerımen sifrlyq bailanysyn küşeitıp, jasandy intellekt, “būltty” tehnologiialar jäne zamanaui derekterdı öŋdeu ortalyqtaryn odan ärı damytudyŋ negızın qalaidy. Sifrlyq infraqūrylymdy jüielı türde damyta otyryp, Qazaqstan Europa men Aziia arasyndaǧy strategiialyq sifrlyq köpır retındegı ūstanymyn nyǧaita tüsude», — dedı Premer-ministrdıŋ orynbasary – jasandy intellekt jäne sifrlyq damu ministrı Jaslan Mädiev.
Qazırgı uaqytta kabeldı jaǧalaudaǧy infraqūrylymǧa qosu jūmystary jürgızılude. Küzde jerüstı infraqūrylymynyŋ qūrylysyn aiaqtap, ıske qosu-baptau jūmystaryn jäne jüienı keşendı testıleudı aiaqtau josparlanyp otyr.
Magistraldy salu jäne ony keiınnen paidalanu jūmystaryna «Qazaqtelekom» AQ men AzerTelecom International kompaniialarynyŋ bırlesken käsıporny – CaspiLink B.V. jauapty. Joba biudjet qarajatyn tartpai, operatorlardyŋ öz qarajaty esebınen jüzege asyryluda.
