يران كاسپي تەڭىزىنىڭ قۇقىقتىق مارتەبەسى تۋرالى كونۆەنتسيانى راتيفيكاتسيالاۋ ماسەلەسىن ەل پارلامەنتىنە جولدادى، دەپ حابارلايدى “ادىرنا” ءتىلشىسى.
Apa اگەنتتىگىنىڭ مالىمەتىنشە، يران سىرتقى ىستەر مينيسترلىگىنىڭ رەسمي وكىلى يسمايل باگاي بۇل شەشىمنىڭ جاقىندا بولعان سوعىسقا نەمەسە ونىڭ سالدارىنا قاتىسى جوق ەكەنىن ايتتى.
ونىڭ سوزىنشە، 2018 جىلى قول قويىلعان قۇجات بىرنەشە جىل بويى ءتۇرلى مەملەكەتتىك ورگانداردا جان-جاقتى قارالعان. قازىر ۇكىمەت پەن سىرتقى ىستەر مينيسترلىگى قۇجاتتى پارلامەنت قاراۋىنا جىبەرۋدى ورىندى دەپ تاپقان.
باگاي كونۆەنتسيا كاسپي ماڭىنداعى بەس مەملەكەتتىڭ بارلىعى راتيفيكاتسيالاعاننان كەيىن عانا كۇشىنە ەنەتىنىن اتاپ ءوتتى. قازىر يران قۇجاتتى راتيفيكاتسيالاماعان كاسپي ماڭىنداعى سوڭعى مەملەكەت بولىپ وتىر.
يران ءسىم وكىلىنىڭ ايتۋىنشا، كونۆەنتسيا يراننىڭ كاسپي تەڭىزىندەگى ۇلەسىن ناقتىلامايدى. سونداي-اق قۇجات تەڭىز ايماقتارىن شەكتەۋ ءۇشىن پايدالانىلاتىن باستاپقى سىزىقتاردى انىقتاۋ ماسەلەسىن رەتتەمەيدى. باگاي بۇل ماسەلە، سونىڭ ىشىندە يراننىڭ ازەربايجان جانە تۇرىكمەنستانمەن ەكىجاقتى كەلىسسوزدەرى اياسىندا بولەك تالقىلانۋى ءتيىس ەكەنىن ايتتى.
ال يران سىرتقى ىستەر ءمينيسترىنىڭ ورىنباسارى كازەم گاريبابادي كاسپي تەڭىزىندەگى قاۋىپسىزدىك ماسەلەلەرى تەك جاعالاۋداعى بەس مەملەكەت اراسىندا شەشىلۋى ءتيىس ەكەنىن حابارلادى.
ول كاسپي تەڭىزى كۇنىنە ارنالعان شارادا سويلەگەن سوزىندە يران مەن كورشىلەس ەلدەر ءۇشىن كاسپيدىڭ جاي عانا سۋ ايدىنى ەمەس، ايماق حالىقتارىنىڭ تاريحى، بولمىسى مەن ءوزارا بايلانىسىنىڭ ماڭىزدى بولىگى ەكەنىن اتاپ ءوتتى.
گاريباباديدىڭ ايتۋىنشا، تەڭىزدىڭ قاۋىپسىزدىگى، تۇراقتىلىعى مەن بولاشاعىنا نەگىزگى جاۋاپكەرشىلىك كاسپي ماڭىنداعى مەملەكەتتەرگە تيەسىلى. بۇل ماسەلەلەر كەلىسىلگەن وڭىرلىك تەتىكتەر ارقىلى شەشىلۋى كەرەك.
كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا 2018 جىلى اقتاۋدا قول قويىلعان بولاتىن. قۇجاتقا جاعالاۋداعى بەس ەل: ازەربايجان، يران، قازاقستان، رەسەي جانە تۇركىمەنستاننىڭ پرەزيدەنتتەرى قول قويعان. سول كەزدەگى پرەزيدەنتتەردىڭ كەيبىرى بۇگىندە قىزمەتتەن كەتسە، كەيبىرى ءالى بيلىك باسىندا وتىر.
