23 قىركۇيەكتە تەگەراندا كاسپي ماڭىنداعى بەس مەملەكەتتىڭ جوعارى لاۋازىمدى وكىلدەرى قاتىساتىن كونفەرەنتسيا وتەدى. بۇل تۋرالى يران سىرتقى ىستەر ءمينيسترىنىڭ ورىنباسارى كازەم گاريبابادي مالىمدەدى، دەپ حابارلايدى «ادىرنا» ءتىلشىسى.
«كاسپي جاعالاۋىنداعى ەلدەردىڭ تەگەرانعا كەلۋى ءوزارا قىزىعۋشىلىق تۋدىراتىن ماسەلەلەردى تالقىلاۋعا، ەكىجاقتى جانە كوپجاقتى بايلانىستاردى نىعايتۋعا، پىكىر الماسۋعا جانە بولاشاقتا نەعۇرلىم سىندارلى ىنتىماقتاستىقتىڭ نەگىزىن قالاۋعا تاماشا مۇمكىندىك بولا الادى. ءبىز بۇل مۇمكىندىكتى كاسپي ديپلوماتياسىن نىعايتۋ ءۇشىن ءتيىمدى پايدالانۋىمىز قاجەت»، – دەدى ول.
ءمينيستردىڭ ورىنباسارى وڭىردەگى سوڭعى وقيعالار، اسىرەسە يزرايل مەن اقش-تىڭ يران يسلام رەسپۋبليكاسىنا قارسى جۇرگىزگەن 40 كۇندىك سوعىسى جانە ونىڭ سالدارى كاسپي تەڭىزىنىڭ گەوساياسي ءارى ستراتەگيالىق ماڭىزىن قايتادان الدىڭعى قاتارعا شىعارعانىن جەتكىزدى.
گاريبابادي كاسپي قاۋىپسىزدىگى، ەڭ الدىمەن، وڭىرلىك جانە ىشكى جاۋاپكەرشىلىك ەكەنىن ايتىپ، ونى جاعالاۋداعى مەملەكەتتەردىڭ وزدەرى كەلىسىلگەن تەتىكتەر ارقىلى قامتاماسىز ەتىپ، قولداپ وتىرۋى قاجەت ەكەنىن اتاپ ءوتتى.
