eGov جۇيەسى بۇزىلىپ، قازاقستاننىڭ 15 ميلليون ازاماتىنىڭ دەرەكتەرى تارادى دەگەن اقپارات شىندىققا سايكەس كەلمەيدى. بۇل تۋرالى جاساندى ينتەللەكت جانە تسيفرلىق دامۋ مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«مينيسترلىك ۋاكىلەتتى ورگاندارمەن بىرلەسىپ تەحنيكالىق تەكسەرۋ جۇرگىزدى. eGov اقپاراتتىق جۇيەلەرىنىڭ بۇزىلعانى انىقتالعان جوق. سونىمەن قاتار ءبىز darknet-تە ساتىلىمعا شىعارىلعان فايلدارعا قول جەتكىزدىك. ولاردى تالداۋ بارىسىندا بۇل ءارتۇرلى بەلگىسىز فايلدار مەن سۋرەتتەردىڭ جيىنتىعى ەكەنى انىقتالدى. جانە ەGov جۇيەسىنەن الىنعان دەرەكتەر بازاسىنىڭ كوشىرمەسى ەمەستىگى بەلگىلى بولدى»،–دەلىنگەن حابارلامادا.
مينيسترلىك مۇنى راستايتىن باسقا دا فاكتىلەر بار ەكەنىن جەتكىزدى.
«اتاپ ايتقاندا، جاريالانعان دەرەكتەر ءماسسيۆىنىڭ كولەمى مەن مازمۇنى ءبىر-بىرىنە سايكەس كەلمەيدى. بۇدان بولەك، eGov جۇيەلەرىندە حابارلاندىرۋ اۆتورى كورسەتكەندەي، پاسپورتتاردىڭ سكان-كوشىرمەلەرى ساقتالاتىن بازا جوق. تسيفرلىق قۇجاتتار مۇلدەم باسقا تاسىلمەن قالىپتاستىرىلادى جانە ساقتالادى»،– دەلىنگەن حابارلامادا.
بۇعان دەيىن داركنەتتە 15 ملن قازاقستاندىقتىڭ جەكە دەرەكتەرى ساتىلىمعا شىعارىلعانى تۋرالى اقپارات تاراعان ەدى.
