eGov jüiesı būzylyp, Qazaqstannyŋ 15 million azamatynyŋ derekterı tarady degen aqparat şyndyqqa säikes kelmeidı. Būl turaly Jasandy intellekt jäne sifrlyq damu ministrlıgınıŋ baspasöz qyzmetı aitty, dep habarlaidy «Adyrna» tılşısı.
«Ministrlık uäkılettı organdarmen bırlesıp tehnikalyq tekseru jürgızdı. eGov aqparattyq jüielerınıŋ būzylǧany anyqtalǧan joq. Sonymen qatar bız darknet-te satylymǧa şyǧarylǧan faildarǧa qol jetkızdık. Olardy taldau barysynda būl ärtürlı belgısız faildar men suretterdıŋ jiyntyǧy ekenı anyqtaldy. Jäne EGov jüiesınen alynǧan derekter bazasynyŋ köşırmesı emestıgı belgılı boldy»,–delıngen habarlamada.
Ministrlık mūny rastaityn basqa da faktıler bar ekenın jetkızdı.
«Atap aitqanda, jariialanǧan derekter massivınıŋ kölemı men mazmūny bır-bırıne säikes kelmeidı. Būdan bölek, eGov jüielerınde habarlandyru avtory körsetkendei, pasporttardyŋ skan-köşırmelerı saqtalatyn baza joq. Sifrlyq qūjattar müldem basqa täsılmen qalyptastyrylady jäne saqtalady»,– delıngen habarlamada.
Būǧan deiın Darknette 15 mln qazaqstandyqtyŋ jeke derekterı satylymǧa şyǧarylǧany turaly aqparat taraǧan edı.
