قازاقستان ازاماتتارىنىڭ دەربەس دەرەكتەرى ساتىلىمعا شىعارىلدى دەگەن اقپارات قوعامدا الاڭداۋشىلىق تۋعىزدى، دەپ حابارلايدى “ادىرنا” ءتىلشىسى.
وسىعان بايلانىستى ىشكى ىستەر مينيسترلىگى اتالعان اقپاراتتى تەكسەردى.
Polisia.kz مالىمەتىنشە، قازىر eGov پورتالىنا زاڭسىز كىرۋ نەمەسە قول جەتكىزۋ فاكتىلەرى تىركەلگەن جوق.
سونىمەن قاتار دەربەس دەرەكتەردى ساتۋعا قاتىستى حابارلاندىرۋدىڭ جاريالانعانى نازارعا الىندى.
قازىر حابارلاندىرۋدى ورنالاستىرعان ادامنىڭ كىم ەكەنى، ۇسىنىلعان دەرەكتەردىڭ قايدان الىنعانى جانە ولاردى زاڭسىز الۋعا نەمەسە تاراتۋعا قاتىسى بار تۇلعالاردى انىقتاۋ بويىنشا قاجەتتى شارالار قابىلدانىپ جاتىر.
ىشكى ىستەر مينيسترلىگى ازاماتتاردىڭ دەربەس دەرەكتەرىن قورعاۋ ماسەلەسىنە ەرەكشە جاۋاپكەرشىلىكپەن قارايتىنىن اتاپ ءوتتى.
قازاقستان كونستيتۋتسياسىنىڭ 21-بابىندا ازاماتتاردى دەربەس دەرەكتەردى زاڭسىز جيناۋدان، وڭدەۋدەن، ساقتاۋدان جانە پايدالانۋدان قورعاۋ كوزدەلگەن. بۇل تالاپتار تسيفرلىق تەحنولوگيالاردى قولدانۋ ارقىلى جاسالاتىن ارەكەتتەرگە دە قاتىستى.
بۇعان دەيىن جاساندى ينتەللەكت جانە تسيفرلىق دامۋ مينيسترلىگى 15 ميلليون ادامنىڭ دەرەكتەرى تارادى دەگەن اقپاراتقا قاتىستى تۇسىنىكتەمە بەرگەن.
