الماتى وبلىسىنىڭ ىلە اۋدانىندا «Kusto Logistics» كومپانياسىنىڭ ءىرى كولىك-لوگيستيكالىق ورتالىعى ىسكە قوسىلدى. مۇندا جۇكتەردى قابىلداۋ، ساقتاۋ، وڭدەۋ جانە تاسىمالداۋ قىزمەتى اتقارىلادى. 26,5 گەكتاردان استام اۋماقتا تەمىرجول، كونتەينەرلەر الاڭى، ەكى قويما، جۇك تيەۋ-ءتۇسىرۋ ورىندارى، اۆتوموبيل لوگيستيكاسى مەن باسقارۋ ورتالىعىن بىرىكتىرگەن زاماناۋي مۋلتيمودالدى كەشەن قۇرىلدى. جىلىنا 100 مىڭ كونتەينەر جۇكتى وڭدەۋگە قۋاتى جەتەدى. قازىرگى ۋاقىتتا 100 جاڭا جۇمىس ورنىن اشۋ جوسپارلانعان. جوباعا 28,1 ملرد تەڭگە ينۆەستيتسيا تارتىلدى، – دەپ حابارلايدى الماتى وبلىسى اكىمىنىڭ ءباسپاسوز قىزمەتى.
نىساننىڭ سالتاناتتى اشىلۋ راسىمىنە الماتى وبلىسىنىڭ اكىمى مارات سۇلتانعازيەۆ، Kusto Group كومپانياسىنىڭ تەڭ قۇرىلتايشىسى ءارى اكتسيونەرى قانات كوپباەۆ، جوباعا قاتىسقان كومپانيالاردىڭ وكىلدەرى مەن ماماندار قاتىستى.
مارات ەلەۋسىزۇلى لوگيستيكالىق ورتالىق تۇرعىنداردى جۇمىسپەن قامتۋعا، شاعىن جانە ورتا بيزنەستىڭ دامۋىنا، سالىق بازاسىنىڭ ۇلعايۋىنا جانە وبلىس ەكونوميكاسىنىڭ وسىمىنە وڭ اسەرىن تيگىزەتىن ماڭىزدى نىسان ەكەنىن اتاپ ءوتتى.
«مەملەكەت باسشىسى قاسىم-جومارت توقاەۆ وڭىرلەردىڭ تۇراقتى دامۋىن قامتاماسىز ەتۋ، ينۆەستيتسيا تارتۋ، ءوندىرىس كولەمىن ۇلعايتۋ، كولىك-لوگيستيكا ينفراقۇرىلىمىن دامىتۋ جانە حالىقتى تۇراقتى جۇمىسپەن قامتۋ مىندەتتەرىن ۇكىمەت پەن اكىمدىكتەردىڭ الدىنا ناقتى قويىپ كەلەدى. وسى باعىتتا الماتى وبلىسىندا اۋقىمدى جۇمىستار جۇرگىزىلۋدە. بۇگىن پايدالانۋعا بەرىلىپ وتىرعان كەشەن ەلىمىزدىڭ كولىك-لوگيستيكالىق الەۋەتىن ارتتىرۋعا سەپتىگىن تيگىزەدى دەپ كۇتىلۋدە. بۇگىندە ىلە اۋدانىنىڭ ءتيىمدى گەوگرافيالىق ورنالاسۋى، كولىك دالىزدەرىنە جاقىندىعى جانە ينجەنەرلىك ينفراقۇرىلىمىنىڭ دامۋى ينۆەستورلار ءۇشىن قولايلى جاعداي قالىپتاستىرۋدا. الماتى وبلىسىنىڭ اكىمدىگى بۇل باعىتتاعى جۇمىستاردى الداعى ۋاقىتتا دا جالعاستىرا بەرەدى. ءاربىر جۇزەگە اسقان جوبا – ءوڭىردىڭ الەۋمەتتىك-ەكونوميكالىق دامۋىنا، حالىقتىڭ ءال-اۋقاتىنىڭ ارتۋىنا جانە ەلىمىزدىڭ باسەكەگە قابىلەتتىلىگىن نىعايتۋعا قوسىلعان يگى ۇلەس بولماق»، – دەدى ايماق باسشىسى.
«Kusto Group»-تىڭ قۇرىلتايشىسى جانە اكتسيونەرى قانات كوپباەۆتىڭ ايتۋىنشا، كومپانيانىڭ قۇرىلعانىنا بيىل نەبارى ءۇش جىل بولعان. سوعان قاراماستان، ۇلكەن جەتىستىكتەرگە قول جەتكىزىپ ۇلگەرگەن.
«قازاقستانداعى كونتەينەرلەردىڭ شامامەن 80 پايىزى الماتى كولىك تورابى ارقىلى وتەدى. ال جۇكتەردىڭ ەداۋىر بولىگى قازاقستاننىڭ سولتۇستىك وڭىرلەرىنەن كەلەدى. بۇل تەرمينال ەلىمىزدىڭ سولتۇستىگى مەن وڭتۇستىگىن بايلانىستىراتىن ورتالىق بولماق. ياعني الماتى وبلىسى ارقىلى يمپورت جانە ەكسپورت جۇكتەرى وزگە وڭىرلەر مەن كورشى مەملەكەتتەرگە جونەلتىلەدى.
سوڭعى جىلدارى مەملەكەت باسشىسىنىڭ جانە ۇكىمەتتىڭ قولداۋىنىڭ ارقاسىندا ترانزيت سالاسى قارقىندى دامىپ كەلەدى.
قازاقستان – ازيا مەن ەۋروپانى بايلانىستىراتىن تابيعي كوپىر. ەگەر بۇل مۇمكىندىكتى تولىق پايدالاناتىن بولساق، ترانزيت ەل ەكونوميكاسىنا مۇنايدان دا كوپ تابىس اكەلۋى مۇمكىن»، – دەدى قانات شوقانۇلى.
ءىس-شارا بارىسىندا قوناقتارعا ورتالىقتىڭ جۇمىسى تانىستىرىلىپ، العاشقى كونتەينەرلىك پويىز جولعا شىقتى. وسىلايشا تەرمينال العاشقى جۇمىسىن باستادى.
لوگيستيكالىق ورتالىقتا 45 توننا جۇكتى كوتەرە الاتىن ارنايى كران ورناتىلعان. ول ساعاتىنا 25 كونتەينەردى قابىلداي الادى. ايىنا 111 مىڭ توننادان استام جۇكتى وڭدەۋگە قاۋقارلى. قازىرگى تاڭدا كەشەندە استىق تەرمينالىنىڭ قۇرىلىسى باستالعان. بۇل جۇمىستار اياقتالعان سوڭ 14 مىڭ توننا اۋىل شارۋاشىلىعى ءونىمىن ساقتاۋعا مۇمكىندىك تۋادى. جوبا قۇرىلىسىن EPC تاسىلىمەن Coteccons KZ كومپانياسى جۇزەگە اسىردى.
جاڭا تەرمينال الماتى وبلىسىنداعى جۇك تاسىمالداۋ مۇمكىندىگىن كەڭەيتىپ، تاۋاردى قابىلداۋ، ساقتاۋ جانە ءارى قاراي جونەلتۋ جۇمىسىن جەڭىلدەتۋگە مۇمكىندىك بەرەدى. سونداي-اق ەلىمىزدىڭ ساۋدا بايلانىسىن دامىتۋعا، كاسىپكەرلەر ءۇشىن تاسىمال ۇدەرىسىن ءتيىمدى ۇيىمداستىرۋعا وڭ ىقپال ەتپەك.
