قازاقستان وڭتۇستىك كورەيانىڭ شەتەلدىك جۇمىس كۇشىن زاڭدى تۇردە تارتۋعا مۇمكىندىك بەرەتىن Employment Permit System (EPS) جۇيەسىنە رەسمي تۇردە قوسىلدى.
كورەيا رەسپۋبليكاسىنىڭ ۇكىمەتى بۇل شەشىمدى 2026 جىلعى 14 تامىزدا شەتەلدىك جۇمىس كۇشى ساياساتى جونىندەگى كوميتەتتىڭ 49-وتىرىسىندا قابىلدادى. وسىلايشا، قازاقستان كورەيانىڭ ە-9 جۇمىسقا رۇقسات بەرۋ جۇيەسىنە قاتىساتىن 18-ءشى مەملەكەت اتاندى، دەپ حابارلايدى "ادىرنا".
قازاقستان ازاماتتارىن وڭتۇستىك كورەياعا جۇمىسقا تارتۋ 2028 جىلدان باستالادى دەپ جوسپارلانىپ وتىر. وعان دەيىن ەكى ەل اراسىندا ءوزارا تۇسىنىستىك تۋرالى مەموراندۋمعا قول قويۋ، قازاقستاندا كورەي تىلىنەن EPS-TOPIK تەستىن وتكىزەتىن ارنايى ورتالىق اشۋ جانە بىرقاتار ۇيىمداستىرۋ جۇمىستارىن اياقتاۋ قاجەت.
قازاقستاننىڭ EPS جۇيەسىنە قوسىلۋ جونىندەگى كەلىسسوزدەرى 2023 جىلدان بەرى جۇرگىزىلىپ كەلەدى. 2026 جىلعى قاڭتاردا كورەيادان كەلگەن ساراپشىلار دەلەگاتسياسى قازاقستانداعى دايىندىق دەڭگەيىن باعالاپ، ازاماتتاردى ىرىكتەۋ، تىلدىك تەستىلەۋ، كاسىبي داعدىلاردى تەكسەرۋ، مەديتسينالىق تەكسەرۋ جانە ەڭبەك ميگرانتتارىنا كورەيا زاڭناماسى تۋرالى اقپارات بەرۋ ماسەلەلەرىن قاراستىردى.
ساراپشىلاردىڭ باعالاۋىنشا، قازاقستان EPS جۇيەسىنە قاتىسۋعا قاجەتتى نەگىزگى ينفراقۇرىلىم مەن ينستيتۋتسيونالدىق مۇمكىندىكتەرگە يە. ونىڭ ىشىندە ۇمىتكەرلەردى اشىق ءارى ءادىل ىرىكتەۋگە مۇمكىندىك بەرەتىن مەملەكەتتىك جانە قوعامدىق ينستيتۋتتار، ءتىل ۇيرەتۋ جۇيەسى، مەديتسينالىق تەكسەرۋ ينفراقۇرىلىمى جانە EPS ورتالىعىن ىسكە قوسۋعا قاجەتتى جاعدايلار بار.
EPS جۇيەسىنىڭ باستى ەرەكشەلىگى — ازاماتتاردى جۇمىسقا ورنالاستىرۋدىڭ رەسمي ءارى اشىق ءتارتىبى. ۇمىتكەرلەر دەلدالدار ارقىلى ەمەس، مەملەكەتتىك جۇيە ارقىلى ىرىكتەلەدى. ولار كورەي تىلىنەن تەست تاپسىرىپ، كاسىبي بىلىكتىلىگىن باعالاۋدان جانە مەديتسينالىق تەكسەرۋدەن وتەدى.
وسىعان بايلانىستى قر ەڭبەك جانە حالىقتى الەۋمەتتىك قورعاۋ مينيسترلىگى ازاماتتارعا الاياق دەلدالداردان ساق بولۋدى ەسكەرتتى. رەسمي راسىمدەر باستالعانعا دەيىن «كورەياعا جۇمىسقا ورنالاستىرۋعا» نەمەسە ىرىكتەۋدەن كەزەكسىز وتكىزۋگە ۋادە بەرەتىن ادامدارعا اقشا بەرمەۋ قاجەت.
تىركەلۋ مەرزىمى، ۇمىتكەرلەرگە قويىلاتىن تالاپتار، تەستىلەۋ ءتارتىبى جانە باسقا دا راسىمدەر تۋرالى اقپارات مينيسترلىكتىڭ رەسمي اقپاراتتىق رەسۋرستارىندا جاريالانادى.
EPS — كورەيا رەسپۋبليكاسىنىڭ شەتەلدىك جۇمىس كۇشىن رەتتەلگەن جانە زاڭدى تۇردە تارتۋعا ارنالعان مەملەكەتتىك جۇيەسى. قازاقستاننىڭ بۇل جۇيەگە قوسىلۋى ازاماتتارعا بەلگىلەنگەن تالاپتار مەن مەملەكەتارالىق راسىمدەر نەگىزىندە وڭتۇستىك كورەيادا رەسمي جۇمىس ىستەۋگە مۇمكىندىك بەرەدى.
قازاقستاننان بولەك، EPS جۇيەسىنە فيليپپين، موڭعوليا، شري-لانكا، ۆەتنام، تايلاند، يندونەزيا، پاكىستان، كامبودجا، قىتاي، بانگلادەش، شىعىس تيمور، نەپال، ميانما، لاوس جانە ورتالىق ازيانىڭ وزبەكستان، قىرعىزستان مەن تاجىكستانى قاتىسادى.
