زيمبابۆەدەگى كاريبا كولىندە پارومنىڭ اۋدارىلۋى سالدارىنان قازا تاپقاندار سانى 97 ادامعا جەتتى. بۇل تۋرالى جەرگىلىكتى The Herald باسىلىمى جازدى، دەپ حابارلايدى «ادىرنا» ءتىلشىسى.
سوڭعى بولىپ ءبىر بالا مەن ايەل ادامنىڭ ءمايىتى تابىلعان. قازىر ولاردىڭ دەنەلەرى كول جاعاسىنداعى اندورا ايلاعىنا جەتكىزىلىپ جاتىر. باسىلىمنىڭ مالىمەتىنشە، ءىز-ءتۇزسىز جوعالعاندار قالماعان. دەگەنمەن، تۋىستارى مەن تانىستارى بىلمەگەن كۇيدە پارومدا بولۋى مۇمكىن ادامداردى ىزدەۋ جۇمىستارى جالعاساتىنى ايتىلدى.
جولاۋشىلار پارومى 12 تامىز كۇنى شامادان تىس جۇكتەلۋدىڭ سالدارىنان اۋدارىلىپ كەتكەن ەدى. اپات كەزىندە 77 ادام قۇتقارىلىپ، كولدىڭ ورتاسىنداعى شاعىن ارالعا جەتكىزىلگەن. ال پارومنىڭ سىيىمدىلىعى 90 جولاۋشىدان اسپاۋى ءتيىس بولعان.
كاريبا كولىنىڭ جارتىسى زيمبابۆە اۋماعىندا، ال ەكىنشى بولىگى زامبيادا ورنالاسقان. كولدىڭ ۇزىندىعى 223 شاقىرىمنان، ەنى 40 شاقىرىمنان اسادى. زيمبابۆە پارلامەنتىنىڭ دەپۋتاتى مۋتسا مۋرومبەندزيدىڭ ايتۋىنشا، پاروم نيامينيامي اۋىلدىق اۋدانىنان كاريبا قالاسىنا باعىت العان. بۇل باعىتتاعى ساپار شامامەن بەس ساعاتقا سوزىلادى.
