سەمەي قالاسىنداعى تۇنگى كلۋبتاردىڭ ءبىرىنىڭ جۇمىسىنا قاتىستى داۋ تۋىندادى، دەپ حابارلايدى "ادىرنا" ءتىلشىسى.
مەكەمە قىزمەتكەرلەرى الەۋمەتتىك جەلىدە پوليتسيا تاراپىنان قىسىم كورسەتىلىپ، جۇمىستى توقتاتۋعا ءماجبۇر بولعاندارىن ايتقان. ال اباي وبلىسىنىڭ پوليتسيا دەپارتامەنتى جاعدايعا قاتىستى ءوز نۇسقاسىن ۇسىندى.
مەكەمە اكىمشىلىگى مەن قىزمەتكەرلەرى الەۋمەتتىك جەلىدە ۆيدەوۇندەۋ جاريالاپ، جوسپارلانعان ءىس-شارالار توقتاتىلعانىن ايتتى. ولاردىڭ سوزىنشە، قىزمەتكەرلەردىڭ بارلىعى جاۋاپ الۋعا شاقىرىلىپ، مەكەمەنىڭ جۇمىسىنا كەدەرگى كەلتىرىلگەن. وسىعان بايلانىستى ۇجىم باس پروكۋراتۋرادان جاعدايعا قۇقىقتىق باعا بەرۋدى سۇراعان.
اباي وبلىسىنىڭ پوليتسيا دەپارتامەنتى بۇل اقپاراتتى ناقتىلاپ، كاسىپكەرلىكتىڭ تولىق توقتاتىلعانىن جوققا شىعاردى. ۆەدومستۆونىڭ مالىمەتىنشە، پوليتسيا قىلمىستىق ءىس اياسىندا قىلمىس بولعان جەردى عانا مورلەگەن.
پوليتسيانىڭ حابارلاۋىنشا، 22 تامىز كۇنى ساعات 04:00 شاماسىندا مەيرامحانانىڭ بي الاڭىندا بەلگىسىز ادام استانادان كەلگەن 37 جاستاعى ەر ادامدى ۇرىپ-سوققان. سوققىدان ەر ادام قۇلاپ، ءبىراز ۋاقىت ەس-ءتۇسسىز جاتقان. وعان سول جەردە بولعان كەلۋشىلەر كومەك كورسەتكەن.
قۇقىق قورعاۋ ورگاندارىنىڭ مالىمەتىنشە، مەكەمە اكىمشىلىگى پوليتسيا مەن جەدەل جاردەم شاقىرماعان.
پوليتسيا بۇل نىساندا قاۋىپسىزدىك ماسەلەلەرى بۇعان دەيىن دە بولعانىن اتاپ ءوتتى. جىل باسىنان بەرى مەكەمە ىشىندە قۇقىق بۇزۋشىلىقتارعا قاتىستى 15 حابارلاما تىركەلگەن. ونىڭ ىشىندە ەكى توپتىق توبەلەس فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر.
ۆەدومستۆو مالىمەتىنشە، مەكەمە سوڭعى كەلۋشى كەتكەنگە دەيىن جۇمىس ىستەيدى، الايدا ىشىندە تۇراقتى ليتسەنزيالانعان كۇزەت جوق. وسىعان بايلانىستى پوليتسيا كلۋب ماڭىنا قوسىمشا پاترۋلدىك جاساق ورنالاستىرعان.
پوليتسيا ويىن-ساۋىق ورىندارىنىڭ يەلەرىنە كەلۋشىلەردىڭ قاۋىپسىزدىگىن قامتاماسىز ەتۋگە، ءتيىستى كۇزەت ۇيىمداستىرۋعا جانە توتەنشە جاعداي كەزىندە پوليتسيا مەن جەدەل مەديتسينالىق كومەك قىزمەتتەرىن ۋاقىتىلى شاقىرۋعا مىندەتتى ەكەنىن ەسكە سالدى.
