Semei qalasyndaǧy tüngı klubtardyŋ bırınıŋ jūmysyna qatysty dau tuyndady, dep habarlaidy "Adyrna" tılşısı.
Mekeme qyzmetkerlerı äleumettık jelıde polisiia tarapynan qysym körsetılıp, jūmysty toqtatuǧa mäjbür bolǧandaryn aitqan. Al Abai oblysynyŋ polisiia departamentı jaǧdaiǧa qatysty öz nūsqasyn ūsyndy.
Mekeme äkımşılıgı men qyzmetkerlerı äleumettık jelıde videoündeu jariialap, josparlanǧan ıs-şaralar toqtatylǧanyn aitty. Olardyŋ sözınşe, qyzmetkerlerdıŋ barlyǧy jauap aluǧa şaqyrylyp, mekemenıŋ jūmysyna kedergı keltırılgen. Osyǧan bailanysty ūjym Bas prokuraturadan jaǧdaiǧa qūqyqtyq baǧa berudı sūraǧan.
Abai oblysynyŋ polisiia departamentı būl aqparatty naqtylap, käsıpkerlıktıŋ tolyq toqtatylǧanyn joqqa şyǧardy. Vedomstvonyŋ mälımetınşe, polisiia qylmystyq ıs aiasynda qylmys bolǧan jerdı ǧana mörlegen.
Polisiianyŋ habarlauynşa, 22 tamyz künı saǧat 04:00 şamasynda meiramhananyŋ bi alaŋynda belgısız adam Astanadan kelgen 37 jastaǧy er adamdy ūryp-soqqan. Soqqydan er adam qūlap, bıraz uaqyt es-tüssız jatqan. Oǧan sol jerde bolǧan keluşıler kömek körsetken.
Qūqyq qorǧau organdarynyŋ mälımetınşe, mekeme äkımşılıgı polisiia men jedel järdem şaqyrmaǧan.
Polisiia būl nysanda qauıpsızdık mäselelerı būǧan deiın de bolǧanyn atap öttı. Jyl basynan berı mekeme ışınde qūqyq būzuşylyqtarǧa qatysty 15 habarlama tırkelgen. Onyŋ ışınde ekı toptyq töbeles faktısı boiynşa sotqa deiıngı tergeu jürgızılıp jatyr.
Vedomstvo mälımetınşe, mekeme soŋǧy keluşı ketkenge deiın jūmys ısteidı, alaida ışınde tūraqty lisenziialanǧan küzet joq. Osyǧan bailanysty polisiia klub maŋyna qosymşa patruldık jasaq ornalastyrǧan.
Polisiia oiyn-sauyq oryndarynyŋ ielerıne keluşılerdıŋ qauıpsızdıgın qamtamasyz etuge, tiıstı küzet ūiymdastyruǧa jäne tötenşe jaǧdai kezınde polisiia men jedel medisinalyq kömek qyzmetterın uaqytyly şaqyruǧa mındettı ekenın eske saldy.
