قورعانىس جانە ىشكى ىستەر مينيسترلەرى تاعايىندالدى

مەملەكەت باسشىسى قاسىم-جومارت توقاەۆتىڭ جارلىعىمەن داۋرەن قوسانوۆ قورعانىس ءمينيسترى، ال ەرجان سادەنوۆ ىشكى ىستەر ءمينيسترى لاۋازىمىنا قايتا تاعايىندالدى. بۇل تۋرالى 3 قىركۇيەكتە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.

ءتيىستى جارلىقتارعا پرەزيدەنت قول قويعان. وسىلايشا داۋرەن جۇماتايۇلى قورعانىس ۆەدومستۆوسىن، ال ەرجان ساپاربەكۇلى ىشكى ىستەر سالاسىن باسقارۋدى جالعاستىرادى.

داۋرەن قوسانوۆ 1969 جىلى 14 قازاندا پاۆلودار وبلىسى كراسنوكۋت اۋدانى نوۆوترويتسكوە اۋىلىندا دۇنيەگە كەلگەن. ارماۆير جوعارى اسكەري اۆياتسيالىق ۇشقىشتار ۋچيليششەسىن (1990 ج.), يۋ.ا. گاگارين اتىنداعى اسكەري-اۋە اكادەمياسىن (2005 ج.) جانە رەسەي فەدەراتسياسى قارۋلى كۇشتەرى باس شتابىنىڭ اسكەري اكادەمياسىن (2013 ج.) بىتىرگەن.

ەڭبەك جولىن ءۇشارال يسترەبيتەلدىك پولكىندە جويعىش-ۇشقىش رەتىندە باستاعان. تالدىقورعان قالاسىنداعى اۆياتسيالىق بازا كومانديرى، شىمكەنت قالاسىنداعى اۆياتسيالىق بازا كومانديرى، قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرى اسكەري-اۋە كۇشتەرىنىڭ قولباسشىسى، اۋە قورعانىسى كۇشتەرى اسكەري ينستيتۋتىنىڭ باستىعى بولعان.

2022–2024 جىلدارى — قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ باس قولباسشىسى، 2024–2025 جىلدارى — قورعانىس ءمينيسترىنىڭ ورىنباسارى – قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ باس قولباسشىسى قىزمەتتەرىن اتقارعان. 2025 جىلعى 8 ماۋسىمدا پرەزيدەنت جارلىعىمەن قورعانىس ءمينيسترى قىزمەتىنە تاعايىندالعان.

ەرجان  سادەنوۆ 1968 جىلى شىعىس قازاقستان وبلىسىندا تۋعان. س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىن، قاراعاندى قالاسىنداعى قازاقستان رەسپۋبليكاسى ۇقك-ءنىڭ جوعارعى مەكتەبىن تامامداعان. 

ىشكى ىستەر ورگاندارىندا 1993 جىلعى شىلدەدەن باستاپ ورتا جانە اعا باسقارۋشى قۇرامنىڭ ءارتۇرلى جەدەل لاۋازىمدارىندا قىزمەت اتقارعان.

ءار جىلدارى ريددەر، وسكەمەن قالالارى پوليتسيا باسقارمالارىنىڭ، شىعىس قازاقستان وبلىسى پوليتسيا دەپارتامەنتىنىڭ ەسىرتكى بيزنەسىنە قارسى كۇرەس باسقارماسىنىڭ باسشىسى، ماڭعىستاۋ وبلىسىنىڭ پوليتسيا دەپارتامەنتى باسشىسىنىڭ ءبىرىنشى ورىنباسارى، ءىىم جەدەل دەپارتامەنت باسشىسى، كولىكتەگى پوليتسيا دەپارتامەنتىنىڭ باسشىسى بولىپ قىزمەت ەتكەن.