ۆلاديۆوستوك قالاسىندا ءوتىپ جاتقان XI شىعىس ەكونوميكالىق فورۋمى اياسىندا قازاقستاندس اتوم ەلەكتر ستانتسياسىن جوبالاۋ، جابدىقتاۋ جانە سالۋ جونىندەگى كەلىسىمشارتقا قول قويىلدى. بۇل تۋرالى بۇگىن، 3 قىركۇيەكتە اتوم ەنەرگياسى جونىندەگى اگەنتتىك جازدى، دەپ حابارلايدى «ادىرنا» ءتىلشىسى.
قۇجاتقا «قازاقستان اتوم ەلەكتر ستانتسيالارى» جشس مەن «روساتوم» مەملەكەتتىك اتوم ەنەرگياسى كورپوراتسياسىنىڭ ەنشىلەس كاسىپورنى – «اتومسترويەكسپورت» اق قول قويعان.
كەلىسىمشارتقا قول قويۋ ءراسىمى اتوم ەنەرگياسى جونىندەگى اگەنتتىگىنىڭ توراعاسى الماسادام ساتقاليەۆ پەن «روساتوم» مەملەكەتتىك كورپوراتسياسىنىڭ باس ديرەكتورى الەكسەي ليحاچيوۆتىڭ قاتىسۋىمەن وتكەن.
كەلىسىمشارتقا قول قويۋ قازاقستانداعى العاشقى اەس قۇرىلىسى جوباسىنىڭ جاڭا پراكتيكالىق كەزەڭگە وتكەنىن بىلدىرەدى. 2026 جىلعى 28 مامىرداعى ۇكىمەتارالىق كەلىسىمگە سايكەس، تاراپتار بەلگىلەنگەن راسىمدەردى، سونىڭ ىشىندە قازاقستان ۇكىمەتىمەن قاجەتتى كەلىسۋدى جۇزەگە اسىرۋعا كىرىسەدى.
«اەس جوباسىن ىسكە اسىرۋ ەل ءۇشىن ستراتەگيالىق ماڭىزعا يە. ەكونوميكانىڭ، ونەركاسىپتىڭ، ينفراقۇرىلىمنىڭ، تسيفرلاندىرۋدىڭ جانە جاساندى ينتەللەكتىنىڭ دامۋىنا بايلانىستى قازاقستاننىڭ سەنىمدى ءارى تۇراقتى ەلەكتر ەنەرگياسىنا دەگەن قاجەتتىلىگى كەزەڭ-كەزەڭىمەن ارتا تۇسەدى»،– دەلىنگەن حابارلامادا.
ەستەرىڭىزگە سالا كەتەيىك، ەلىمىزدەگى العاشقى اتوم ەلەكتر ستانتسياسى الماتى وبلىسى جامبىل اۋدانىنداعى ۇلكەن اۋىلى ماڭىندا سالىنادى. وعان «بالقاش» دەگەن اتاۋ بەرىلگەن بولاتىن. اەس سالۋ تۋرالى شەشىم 2024 جىلعى 6 قازاندا وتكەن جالپىۇلتتىق رەفەرەندۋمدا قابىلدانعان.
