تۇركىمەنستاندا كاسپي تەڭىزىنىڭ تۇراقتى دامۋى مەن باسقارۋىنا ارنالعان 11-ءشى حالىقارالىق وقۋ كۋرسى باستالدى. ءىس-شارا 7 قىركۇيەكتە «ارچابيل» قوناقۇيىندە ءوتتى, دەپ حابارلايدى "ادىرنا".
وقۋ كۋرسىن تۇركىمەنستاننىڭ سىرتقى ىستەر مينيسترلىگى، كاسپي تەڭىزى ينستيتۋتى جانە حالىقارالىق مۇحيت ينستيتۋتى ۇيىمداستىرىپ وتىر.
كۋرستىڭ اشىلۋ راسىمىنە تۇركىمەنستانداعى بۇۇ تۇراقتى ۇيلەستىرۋشىسى سياوتسزيۋن گرەيس ۆان، حالىقارالىق مۇحيت ينستيتۋتىنىڭ باسقارۋشى ديرەكتورى انتونەللا ۆاسساللو، كۋرس ديرەكتورى دوكتور پارۆين فارشچي، تەڭىز كەڭىستىگىن جوسپارلاۋ جونىندەگى ساراپشى دوكتور اندرەي ابراميچ جانە تۇركىمەنستان كاسپي تەڭىزى ينستيتۋتىنىڭ ديرەكتورى مىرات اتادجانوۆ قاتىستى.
ءىس-شارادا كاسپي تەڭىزىن تۇراقتى پايدالانۋ جانە ساقتاۋ باعىتىندا وڭىرلىك ىنتىماقتاستىقتى كۇشەيتۋ، سونداي-اق وسى سالاداعى مامانداردىڭ كاسىبي بىلىكتىلىگىن ارتتىرۋ ماسەلەلەرى تالقىلاندى.
حالىقارالىق وقۋ باعدارلاماسى تۇركىمەنستاندا 2013 جىلدان بەرى وتكىزىلىپ كەلەدى. وعان كاسپي ماڭىنداعى بەس مەملەكەتتىڭ وكىلدەرى قاتىسادى. باعدارلاما بارىسىندا حالىقارالىق تەڭىز قۇقىعى جانە كاسپي تەڭىزىنىڭ ەكولوگيالىق پروبلەمالارىنا ەرەكشە كوڭىل بولىنەدى.
بيىلعى كۋرستىڭ نەگىزگى تاقىرىپتارى – كاسپي تەڭىزىنىڭ ەكولوگيالىق جاعدايى جانە ونىڭ تايىزدانۋىنا بايلانىستى ماسەلەلەر.
ايتا كەتەيىك، بۇۇ باس اسسامبلەياسى 2026 جىلعى 24 شىلدەدە تۇركىمەنستاننىڭ باستاماسىمەن «2028 جىل – حالىقارالىق قۇقىق جىلى» دەپ جاريالاۋ تۋرالى 80/295 قارارىن كونسەنسۋس ارقىلى قابىلدادى. قارارعا 78 مەملەكەت تەڭ اۆتور رەتىندە قولداۋ ءبىلدىردى.
باعدارلاما باستالعالى بەرى تۇركىمەنستان، قازاقستان، ازەربايجان، يران، رەسەي جانە قىتايدان كاسپي تەڭىزىنە قاتىستى ءتۇرلى سالالاردا جۇمىس ىستەيتىن 175 مامان وقۋدان وتكەن.
11-ءشى حالىقارالىق وقۋ كۋرسى 18 قىركۇيەككە دەيىن جالعاسادى.
