فوتو: Vittorio Zunino Celotto/Getty Images
يراندىق اكتريسا لالە مارزبان 83-ءشى ۆەنەتسيا حالىقارالىق كينوفەستيۆالىندە «Orizzonti» باعدارلاماسىنىڭ ۇزدىك اكتريساسى جۇلدەسىنە يە بولدى. ول بۇل ماراپاتتى رەجيسسەر موحسەن گارايدىڭ Moragheb («قۇلاپ جاتقان ءۇي») فيلمىندەگى باستى ءرولى ءۇشىن الدى، دەپ حابارلايدى "ادىرنا".
فيلمدە لالە مارزبان ءسان سالاسىندا شەتەلدە ءبىلىم الىپ، ءوز ارماندارىن جۇزەگە اسىرۋدى كوزدەيتىن جاس ايەلدىڭ بەينەسىن سومدايدى. الايدا ونىڭ جوسپارلارىنا اۆتوريتارلى اكەسى كەدەرگى كەلتىرەدى. اكەسى تۇرمە كۇزەتشىسى رەتىندە جۇمىس ىستەيدى جانە قىزىنىڭ ومىرىنە قاتاڭ باقىلاۋ ورناتقان.
اكتريسانىڭ فيلمدە حيدجابسىز ونەر كورسەتۋى دە ەرەكشە نازار اۋداردى. بۇل يراننىڭ كينويندۋسترياسىنداعى قالىپتاسقان تالاپتار مەن قوعامدىق جاعدايدى ەسكەرگەندە، ماڭىزدى شىعارماشىلىق شەشىمدەردىڭ ءبىرى رەتىندە باعالاندى.
ماراپاتتاۋ راسىمىندە لالە مارزبان ەموتسياعا تولى ءسوز سويلەپ، جۇلدەسىن «يراننىڭ باتىل ايەلدەرىنە» ارنادى. ونىڭ ايتۋىنشا، ەلدەگى ايەلدەر نەگىزگى قۇقىقتارى مەن قاراپايىم بوستاندىقتارى ءۇشىن ۇلكەن قىسىمعا ۇشىراپ كەلەدى.
اكتريسا ءسوزىنىڭ سوڭىن پارسى تىلىندە ايتىپ، يران حالقىنىڭ قازىرگى تاڭدا ومىرىندەگى ەڭ قيىن كەزەڭدەردىڭ ءبىرىن باستان وتكەرىپ جاتقانىن اتاپ ءوتتى. سونىمەن بىرگە ول ادامداردى ۇمىتتەرىن جوعالتپاۋعا شاقىردى.
ايتا كەتسەك، بۇعان دەيىن كينورەجيسسەر يليا حرجانوۆسكي دە ۆەنەتسيا حالىقارالىق كينوفەستيۆالىندە «ۇزدىك رەجيسسەر» نوميناتسياسى بويىنشا «كۇمىس ارىستان» جۇلدەسىنە يە بولعانىن حابارلادىق. رەسەيدە دۇنيەگە كەلگەن رەجيسسەر جۇلدەسىن ۋكرايناعا ارناعان بولاتىن.
