Foto: Vittorio Zunino Celotto/Getty Images
İrandyq aktrisa Lale Marzban 83-şı Venesiia halyqaralyq kinofestivalınde «Orizzonti» baǧdarlamasynyŋ üzdık aktrisasy jüldesıne ie boldy. Ol būl marapatty rejisser Mohsen Garaidıŋ Moragheb («Qūlap jatqan üi») filmındegı basty rölı üşın aldy, dep habarlaidy "Adyrna".
Filmde Lale Marzban sän salasynda şetelde bılım alyp, öz armandaryn jüzege asyrudy közdeitın jas äieldıŋ beinesın somdaidy. Alaida onyŋ josparlaryna avtoritarly äkesı kedergı keltıredı. Äkesı türme küzetşısı retınde jūmys ısteidı jäne qyzynyŋ ömırıne qataŋ baqylau ornatqan.
Aktrisanyŋ filmde hidjabsyz öner körsetuı de erekşe nazar audardy. Būl İrannyŋ kinoindustriiasyndaǧy qalyptasqan talaptar men qoǧamdyq jaǧdaidy eskergende, maŋyzdy şyǧarmaşylyq şeşımderdıŋ bırı retınde baǧalandy.
Marapattau räsımınde Lale Marzban emosiiaǧa toly söz söilep, jüldesın «İrannyŋ batyl äielderıne» arnady. Onyŋ aituynşa, eldegı äielder negızgı qūqyqtary men qarapaiym bostandyqtary üşın ülken qysymǧa ūşyrap keledı.
Aktrisa sözınıŋ soŋyn parsy tılınde aityp, İran halqynyŋ qazırgı taŋda ömırındegı eŋ qiyn kezeŋderdıŋ bırın bastan ötkerıp jatqanyn atap öttı. Sonymen bırge ol adamdardy ümıtterın joǧaltpauǧa şaqyrdy.
Aita ketsek, būǧan deiın kinorejisser İlia Hrjanovskii de Venesiia halyqaralyq kinofestivalınde «Üzdık rejisser» nominasiiasy boiynşa «Kümıs arystan» jüldesıne ie bolǧanyn habarladyq. Reseide düniege kelgen rejisser jüldesın Ukrainaǧa arnaǧan bolatyn.
