اقش قارجى مينيسترلىگى رەسەيدىڭ ۆتب بانكىنە قارسى جاڭا سانكتسيالار ەنگىزىپ، ونى يرانعا حالىقارالىق شەكتەۋلەردى اينالىپ وتۋگە كومەكتەستى دەپ ايىپتادى. شەشىم 14 قىركۇيەكتە يراننىڭ قارجى سەكتورىنا قاتىستى سانكتسيالىق رەجيم اياسىندا قابىلدانعان، دەپ حابارلايدى «ادىرنا» ءتىلشىسى.
اقش قارجى مينيسترلىگىنىڭ شەتەلدىك اكتيۆتەردى باقىلاۋ باسقارماسىنىڭ مالىمەتىنشە، سوڭعى ءۇش جىلدا ۆتب يراندا بانك كەڭسەلەرىن اشىپ، سانكتسياعا ىلىككەن يراندىق بانكتەرمەن كوررەسپوندەنتتىك قاتىناستار ورناتقان جانە ماسكەۋ مەن تەگەران اراسىنداعى قارجىلىق ارنالاردى قۇرۋعا قاتىسقان. سونداي-اق امەريكالىق ۆەدومستۆونىڭ دەرەگىنە سايكەس، بانك رەسەيلىك رۋبل مەن يراندىق ريال ارقىلى ەسەپ ايىرىسۋ جۇيەسىن قالىپتاستىرىپ، بۇعاتتالعان يراندىق اكتيۆتەردىڭ ميللياردتاعان دوللارىن جىلجىتۋعا ارەكەت جاساعان.
جاڭا شەكتەۋلەر يران ەكونوميكاسىنىڭ جەكەلەگەن سالالارىنا، سونىڭ ىشىندە قارجى سەكتورىنا قاتىسى بار تۇلعالار مەن ۇيىمدارعا سانكتسيا سالۋعا مۇمكىندىك بەرەتىن Executive Order 13902 جارلىعى نەگىزىندە ەنگىزىلگەن. اقش قارجى مينيسترلىگى ۆتب-عا يرانعا قاتىستى سانكتسيالىق رەجيم قولدانىلعاننان كەيىن دە ونىمەن جۇمىسىن جالعاستىراتىن شەتەلدىك قارجى ۇيىمدارى ەكىنشى دەڭگەيلى سانكتسيالارعا ۇشىراۋ قاۋپى جوعارى ەكەنىن ەسكەرتتى.
«ەكونوميكالىق وقشاۋلاۋ» وپەراتسياسى اياسىندا قارجى مينيسترلىگى يران رەجيمىنىڭ تەرروريستىك قىزمەتىن قولداۋعا مۇمكىندىك بەرەتىن ماتەريالدىق، تەحنولوگيالىق نەمەسە قارجىلىق كومەك كورسەتەتىن تۇلعالاردىڭ قىزمەتىن انىقتاپ، وعان توسقاۋىل قويۋدى جالعاستىرادى. ءبىز رەجيمدى قولداۋدىڭ كەز كەلگەن تۇرىنە قارسىمىز جانە يرانعا جاردەمدەسۋشىلەردى اشكەرەلەۋ مەن وقشاۋلاۋدى جالعاستىرامىز»، – دەدى اقش قارجى ءمينيسترى سكوتت بەسسەنت.
ايتا كەتەيىك، ۆتب بانكى بۇعان دەيىن دە ۋكرايناداعى سوعىس باستالعاننان كەيىن اقش ەنگىزگەن بۇعاتتاۋشى سانكتسيالار تىزىمىنە ەنگىزىلگەن بولاتىن. سول كەزدە «ۆتب بانك (قازاقستان)» اق ەنشىلەس ۇيىمى دا سانكتسياعا ىلىگىپ، ونىڭ اكتيۆتەرى مەن مۇلىكتىك مۇددەلەرى بۇعاتتالاتىن كومپانيالار قاتارىنا قوسىلعان.
سونىمەن قاتار «ۆتب بانك (قازاقستان)» اق ەۋروپالىق وداق كەڭەسىنىڭ 19-سانكتسيالار پاكەتىنە دە ەنگىزىلگەن.
سوعان قاراماستان، ۆتب (قازاقستان) قازاقستان نارىعىندا ەكىنشى دەڭگەيلى بانك رەتىندە جۇمىسىن جالعاستىرىپ كەلەدى. بانكتىڭ رەسمي سايتىنداعى مالىمەتكە سايكەس، ونىڭ ەل بويىنشا 12 فيليالى بار. قارجى ۇيىمى الماتى، استانا، اقتاۋ، اقتوبە، قاراعاندى، كوكشەتاۋ، قوستاناي، پاۆلودار، پەتروپاۆل، ورال، شىمكەنت جانە وسكەمەن قالالارىندا قىزمەت كورسەتەدى. باس كەڭسەسى الماتى قالاسىندا ورنالاسقان.
