AQŞ Qarjy ministrlıgı Reseidıŋ VTB bankıne qarsy jaŋa sanksiialar engızıp, ony İranǧa halyqaralyq şekteulerdı ainalyp ötuge kömektestı dep aiyptady. Şeşım 14 qyrküiekte İrannyŋ qarjy sektoryna qatysty sanksiialyq rejim aiasynda qabyldanǧan, dep habarlaidy «Adyrna» tılşısı.
AQŞ Qarjy ministrlıgınıŋ Şeteldık aktivterdı baqylau basqarmasynyŋ mälımetınşe, soŋǧy üş jylda VTB İranda bank keŋselerın aşyp, sanksiiaǧa ılıkken irandyq banktermen korrespondenttık qatynastar ornatqan jäne Mäskeu men Tegeran arasyndaǧy qarjylyq arnalardy qūruǧa qatysqan. Sondai-aq amerikalyq vedomstvonyŋ deregıne säikes, bank reseilık rubl men irandyq rial arqyly esep aiyrysu jüiesın qalyptastyryp, būǧattalǧan irandyq aktivterdıŋ milliardtaǧan dollaryn jyljytuǧa äreket jasaǧan.
Jaŋa şekteuler İran ekonomikasynyŋ jekelegen salalaryna, sonyŋ ışınde qarjy sektoryna qatysy bar tūlǧalar men ūiymdarǧa sanksiia saluǧa mümkındık beretın Executive Order 13902 jarlyǧy negızınde engızılgen. AQŞ Qarjy ministrlıgı VTB-ǧa İranǧa qatysty sanksiialyq rejim qoldanylǧannan keiın de onymen jūmysyn jalǧastyratyn şeteldık qarjy ūiymdary ekınşı deŋgeilı sanksiialarǧa ūşyrau qaupı joǧary ekenın eskerttı.
«Ekonomikalyq oqşaulau» operasiiasy aiasynda Qarjy ministrlıgı İran rejimınıŋ terroristık qyzmetın qoldauǧa mümkındık beretın materialdyq, tehnologiialyq nemese qarjylyq kömek körsetetın tūlǧalardyŋ qyzmetın anyqtap, oǧan tosqauyl qoiudy jalǧastyrady. Bız rejimdı qoldaudyŋ kez kelgen türıne qarsymyz jäne İranǧa järdemdesuşılerdı äşkereleu men oqşaulaudy jalǧastyramyz», – dedı AQŞ Qarjy ministrı Skott Bessent.
Aita keteiık, VTB bankı būǧan deiın de Ukrainadaǧy soǧys bastalǧannan keiın AQŞ engızgen būǧattauşy sanksiialar tızımıne engızılgen bolatyn. Sol kezde «VTB bank (Qazaqstan)» AQ enşıles ūiymy da sanksiiaǧa ılıgıp, onyŋ aktivterı men mülıktık müddelerı būǧattalatyn kompaniialar qataryna qosylǧan.
Sonymen qatar «VTB bank (Qazaqstan)» AQ Europalyq odaq keŋesınıŋ 19-sanksiialar paketıne de engızılgen.
Soǧan qaramastan, VTB (Qazaqstan) Qazaqstan naryǧynda ekınşı deŋgeilı bank retınde jūmysyn jalǧastyryp keledı. Banktıŋ resmi saityndaǧy mälımetke säikes, onyŋ el boiynşa 12 filialy bar. Qarjy ūiymy Almaty, Astana, Aqtau, Aqtöbe, Qaraǧandy, Kökşetau, Qostanai, Pavlodar, Petropavl, Oral, Şymkent jäne Öskemen qalalarynda qyzmet körsetedı. Bas keŋsesı Almaty qalasynda ornalasqan.
