جەزقازعان قالاسىنىڭ اكىمى بولىپ مۇرات بورىباەۆ تاعايىندالدى. بۇگىن، 17 قىركۇيەكتە ۇلىتاۋ وبلىسىنىڭ اكىمى ەسەت بايكەن وبلىس ورتالىعىنىڭ اكتيۆىنە جاڭا باسشىنى تانىستىردى، دەپ حابارلايدى «ادىرنا» ءتىلشىسى.
بۇعان دەيىن قايرات شايجانوۆتىڭ قىزمەتىنەن كەتكەنىن جازعان ەدىك.
مۇرات بورىباەۆ 1991 جىلى قارساقباي كەنتىندە دۇنيەگە كەلگەن. 2012 جىلى قاراعاندى مەملەكەتتىك تەحنيكالىق ۋنيۆەرسيتەتىن «مەتاللۋرگيا قارا جانە ءتۇستى مەتاللدار» ماماندىعى بويىنشا، 2014 جىلى قاراعاندى قازتۇتىنۋوداعى ەكونوميكالىق ۋنيۆەرسيتەتىن «ەكونوميكا» ماماندىعى بويىنشا تامامداعان. 2021 جىلى قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىندا وقىپ، «مەملەكەتتىك مەنەدجمەنت» ماگيسترى اتانعان.
ەڭبەك جولىن «قازاقمىس» كورپوراتسياسى جشس-ءنىڭ «قاراعاندىتۇستىمەت» وندىرىستىك بىرلەستىگىنە قاراستى «نۇرقازعان» بايىتۋ فابريكاسى باس كورپۋسىندا ءۇشىنشى رازريادتى فلوتاتور بولىپ باستاعان.
2011–2012 جىلدارى وسى فابريكا جەتەكشىلىگىنىڭ اكىمشىلىك باس كورپۋسىندا ءىس جۇرگىزۋشى بولعان. سونداي-اق فابريكانىڭ باس كورپۋسى باقىلاۋ تسەحىندا شەبەر بولىپ جۇمىس ىستەگەن. 2012–2013 جىلدارى باس كورپۋس تسەحىنىڭ باستىعى قىزمەتىن اتقارعان.
2013–2014 جىلدارى «قازاقمىس» كورپوراتسياسى جشس-ءنىڭ «شىعىستۇستىمەت» وندىرىستىك بىرلەستىگىندەگى ورلوۆ كەنىشى بايىتۋ فابريكاسىنىڭ باس ينجەنەرى بولعان. 2014–2015 جىلدارى كورپوراتسيانىڭ «جتم» وندىرىستىك بىرلەستىگىنە قاراستى №1, 2, 3 جەزقازعان بايىتۋ فابريكاسىنىڭ №2 باس كورپۋسى تسەحىن باسقارعان.
2015–2017 جىلدارى «قازاقمىس» كورپوراتسياسى جشس-ءنىڭ «قتم» فيليالىنداعى «نۇرقازعان» بايىتۋ فابريكاسىنىڭ ديرەكتورى بولعان. 2017–2024 جىلدارى «جەزقازعانتۇستىمەت» وندىرىستىك بىرلەستىگىنە قاراستى №1, 2, 3 جەزقازعان بايىتۋ فابريكاسىن باسقارعان. 2024 جىلى ساتباەۆ قالاسىنىڭ اكىمى قىزمەتىنە تاعايىندالعان.
