فوتو: NCRI
يران بيلىگى تەگەرانداعى فرانتسۋز ءتىلى ورتالىعىنىڭ (CLF) جۇمىسىن توقتاتتى. ورتالىق فرانتسيا ەلشىلىگىمەن بايلانىستى مەكەمە رەتىندە بەلگىلى. بۇل تۋرالى Caliber.Az برازيليالىق The Rio Times ينتەرنەت-باسىلىمىنا سىلتەمە جاساپ جاريالادى، دەپ حابارلايدى "ادىرنا".
يران سوت ورگاندارىنىڭ مالىمەتىنشە، ورتالىق بىرنەشە جىل بويى ءتىل كۋرستارىن وتكىزىپ كەلگەن، الايدا قاجەتتى ليتسەنزيانى الماعان. تەگەران پروكۋراتۋراسى مەكەمەنىڭ سوت شەشىمى نەگىزىندە جابىلعانىن حابارلادى.
يران بيلىگى CLF-ءتى ۇلتتىق قاۋىپسىزدىككە جانە ەلدىڭ مادەني قۇندىلىقتارىنا قايشى قىزمەت جۇرگىزدى دەپ ايىپتادى. رەسمي مالىمدەمەدە ورتالىقتىڭ قوعامداعى ىقپالدى توپ وكىلدەرىمەن بايلانىس ورناتىپ، ولاردىڭ اراسىندا جەلىلەر قالىپتاستىرعانى جانە بىلىكتى يراندىقتاردىڭ شەتەلگە كەتۋىنە ىقپال ەتكەنى ايتىلعان.
فرانتسيانىڭ سىرتقى ىستەر مينيسترلىگى ورتالىقتىڭ جابىلۋىنا نارازىلىق ءبىلدىردى. پاريج بۇل شەشىمگە بايلانىستى ءتيىستى جاۋاپ شارالارىن قابىلدايتىنىن جانە يران ەلشىسىن شاقىراتىنىن مالىمدەدى.
فرانتسيا مەن يران اراسىنداعى ديپلوماتيالىق قاتىناستار سوڭعى ايلاردا بىرنەشە رەت شيەلەنىستى. شىلدە ايىندا يران بيلىگى فرانتسيا ەلشىلىگىنىڭ ەكى قىزمەتكەرىن بىرنەشە ساعاتقا ۇستاعان. فرانتسيا بۇل ارەكەتتى ديپلوماتيالىق يممۋنيتەتتىڭ بۇزىلۋى دەپ باعالادى.
تامىزدا پاريج اتالعان وقيعاعا جاۋاپ رەتىندە ەكى يراندىق ديپلوماتتى ەلدەن شىعاراتىنىن حابارلادى.
