فوتو: اقجايىق
كاسپي تەڭىزىندەگى قايعىلى وقيعادان امان قالعان 19 جاستاعى سارباز بەكەت قۋاندىقتىڭ قازىرگى جاعدايى جاقسى. بۇل تۋرالى ونىڭ اناسى "اق جايىق" مالىمدەدى، دەپ حابارلايدى "ادىرنا".
جاس سارباز وقيعادان كەيىن ءوز كۇشىمەن جاعاعا جەتكەن.
بۇعان دەيىن «اق جايىق» بەكەت قۋاندىقتىڭ اۋرۋحاناعا جەتكىزىلگەنى تۋرالى اقپارات تاراتقان. الايدا وقيعانىڭ العاشقى ساعاتتارىندا مالىمەتتىڭ از بولۋىنا بايلانىستى ونىڭ تۋىستارى ساربازدىڭ امان قالعانىن بىلگەنىمەن، اۋرۋحاناعا ءتۇستى دەپ ويلاعان.
وتباسى تاڭەرتەڭ اقتاۋعا جەتىپ، بەكەتپەن كەزدەسكەن كەزدە ونىڭ اۋرۋحانادا ەمەس ەكەنىن انىقتاعان.
بەكەت قۋاندىق اتىراۋ وبلىسى ماحامبەت اۋىلىنىڭ تۋماسى. ول 2025 جىلعى 3 قازاندا اسكەرگە شاقىرىلىپ، №29011 اسكەري بولىمىندە قىزمەت اتقارىپ جۇرگەن.
ساربازدىڭ اناسى قارلىعاش مىرزعاليەۆانىڭ ايتۋىنشا، قايعىلى حاباردى ەستي سالا وتباسى اقتاۋعا جولعا شىققان.
«اللاعا شۇكىر، ۇلىم امان. تاڭەرتەڭ اقتاۋعا كەلىپ، ءوز كوزىمىزبەن كوردىك. ول ءدىن امان، وزدىگىنەن ءجۇرىپ-تۇرادى. سىن ساعاتتا ءوز كۇشىمەن جاعاعا جەتكەن. قالعان جاعدايلار تەكسەرىستەن كەيىن بەلگىلى بولادى. بالالارىمىز ءالى جاس، بۇل وقيعا ولاردىڭ ءومىر بويى ەسىندە قالادى»، – دەدى ول.
قارلىعاش مىرزعاليەۆا قازا بولعان اسكەري قىزمەتشىلەردىڭ جاقىندارىنا كوڭىل ايتىپ، وقيعانىڭ ەل ءۇشىن اۋىر قازا بولعانىن جەتكىزدى.
«بۇل بۇكىل قازاقستان ءۇشىن وتە اۋىر قايعى. قازىر اكە-شەشەلەرىنىڭ قانداي كۇيدە ەكەنىن سوزبەن جەتكىزۋ مۇمكىن ەمەس. بارلىق قازا بولعان جىگىتتەردىڭ اكە-شەشەلەرىنە شىن جۇرەكتەن كوڭىل ايتامىن. ەندى ەشكىم مۇندايدى باستان كەشىرمەسىن»، – دەدى ساربازدىڭ اناسى.
ەسكە سالايىق، 24 قىركۇيەكتە ماڭعىستاۋ وبلىسىندا قازاقستان قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى كەزىندە 17 اسكەري قىزمەتشىنى تەڭىز اعىزىپ اكەتكەن. ولار كاسپي جاعالاۋىندا وقۋ-جاۋىنگەرلىك تاپسىرما ورىنداپ جاتقاندا اۋا رايى كۇرت ناشارلاپ، جەل كۇشەيگەن.
قورعانىس مينيسترلىگىنىڭ مالىمەتىنشە، 14 اسكەري قىزمەتشى قازا تاپقان، ۇشەۋى قۇتقارىلدى.
قايعىلى وقيعادان كەيىن 25 قىركۇيەك قازاقستاندا جالپىۇلتتىق ازا تۇتۋ كۇنى بولىپ جاريالانعان بولاتىن.
