قىرعىزستاننىڭ سىرتقى ىستەر ءمينيسترى جەەنبەك كۋلۋباەۆ رەسەيدە جۇرگەن ازاماتتارىن سوعىسقا قاتىسۋعا ماجبۇرلەۋ جاعدايلارى تىركەلگەنىن ايتتى دەگەن اقپار تارادى، دەپ حابارلايدى “ادىرنا” ءتىلشىسى.
فەرعانا باسىلىمىنىڭ دەرەگىنشە، ۆەدومستۆو مۇنداي جاعدايلاردا ازاماتتاردى ەلگە قايتارۋعا كومەكتەسۋگە تىرىسادى.
ماسەلە قىرعىزستان پارلامەنتىنىڭ حالىقارالىق ىستەر، قورعانىس، قاۋىپسىزدىك جانە كوشى-قون جونىندەگى كوميتەتىنىڭ وتىرىسىندا كوتەرىلدى. جيىنعا قاتىسقان دەپۋتات ايبەك التىنبەكوۆ رەسەيدە ءبىر ازاماتتىڭ سوت شەشىمى شىقپاي تۇرىپ اسكەري قىزمەت تۋرالى كەلىسىمشارتقا قول قويۋعا ءماجبۇر بولعانىن ايتتى. كەيىن ول اسكەري دايىندىق لاگەرىنە جىبەرىلگەن.
جەەنبەك كۋلۋباەۆتىڭ سوزىنشە، ازاماتتار اسكەري كوميسسارياتتاردا نەمەسە تەرگەۋ يزولياتورلارىندا كەلىسىمشارتقا قول قويۋعا ءماجبۇر بولاتىن جاعدايلار كەزدەسەدى. ەگەر سىرتقى ىستەر مينيسترلىگىنە بۇل تۋرالى ۋاقىتىلى اقپارات تۇسسە، ۆەدومستۆو ارالاسىپ، ازاماتتاردى مايدانعا جىبەرمەۋگە كۇش سالادى.
ءمينيستردىڭ ايتۋىنشا، كەيبىر ازاماتتار رەسەي قورعانىس مينيسترلىگىمەن كەلىسىمشارتقا وتىرعانىن ءتىپتى جاقىندارىنا دا حابارلامايدى. سونىڭ سالدارىنان ديپلوماتتار ءماجبۇرلى تۇردە اسكەرگە تارتۋ جاعدايلارى تۋرالى دەر كەزىندە بىلە بەرمەيدى.
كەيىن اتا-انالارى بالالارىنىڭ كەلىسىمشارتقا وتىرعانىن ءبىلىپ، مينيسترلىككە كومەك سۇراپ جۇگىنەدى. مۇنداي جاعدايدا قىرعىزستاننىڭ ۋكرايناداعى ەلشىلىگى ارقىلى ازاماتتارمەن بايلانىس ورناتۋعا جانە ولاردى ەلگە قايتارۋعا جاردەمدەسۋگە ارەكەت جاسالادى.
كۋلۋباەۆ كەيبىر جاعدايلاردا ازاماتتاردىڭ رەسەي اسكەرى قاتارىندا سوعىسقانى ولاردىڭ جارالانعانىنان نەمەسە قازا تاپقانىنان كەيىن عانا بەلگىلى بولاتىنىن اتاپ ءوتتى. وسىعان بايلانىستى ول وسىنداي جاعدايعا تاپ بولعان ازاماتتاردىڭ تۋىستارىن سىرتقى ىستەر مينيسترلىگىنە ۋاقىتىلى حابارلاسۋعا شاقىردى.
بۇعان دەيىن قازاقستان دا رەسەيدىڭ ءسىم رەسەي اسكەرى قاتارىندا جۇرگەن قازاقستاندىقتاردى ەلگە قايتارۋعا جاردەمدەسۋ تۋرالى ءوتىنىش جاساعان.
ماتەريالدا كەلتىرىلگەن مالىمەتكە سايكەس، 2026 جىلى رەسەي اسكەرى قاتارىندا ۋكرايناعا قارسى سوعىسقا ورتالىق ازيا ەلدەرىنىڭ 12,5 مىڭنان استام ازاماتى قاتىسقان.
