15 قازاندا قاسىم-جومارت توقاەۆ پەن يلحام اليەۆ ترانسكاسپي تالشىقتى-وپتيكالىق كابەل جەلىسىن ونلاين فورماتتا رەسمي تۇردە ىسكە قوستى، دەپ حابارلايدى «ادىرنا» ءتىلشىسى.
Report اگەنتتىگى تاراتقان اقپاراتقا سايكەس، مەملەكەت باسشىلارى كەزدەسۋدە ەكى ەل اراسىنداعى ستراتەگيالىق ارىپتەستىك پەن وداقتاستىق قاتىناستاردىڭ دامۋىن تالقىلادى. سونداي-اق ءوزارا ساپارلاردىڭ ەكىجاقتى ىنتىماقتاستىقتى كەڭەيتۋگە قوسقان ۇلەسى اتاپ ءوتىلدى. پرەزيدەنتتەر باكۋدە وتكەن ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VII ءسامميتىنىڭ قورىتىندىلارى جونىندە دە پىكىر الماستى.
«تسيفرلىق جىبەك جولى» باستاماسى اياسىندا جۇزەگە اسىرىلعان جوبا بويىنشا كاسپي تەڭىزىنىڭ تۇبىمەن قازاقستاننىڭ اقتاۋ قالاسى مەن ازەربايجاننىڭ سۋمعايىت قالاسى اراسىندا ۇزىندىعى شامامەن 380 شاقىرىم كابەل تارتىلعان. ونىڭ وتكىزۋ قابىلەتى سەكۋندىنا 400 تەرابيتتەن اسادى.
جاڭا جەلى قىتاي مەن ورتالىق ازيادان ەۋروپاعا ازەربايجان، قازاقستان جانە گرۋزيا ارقىلى دەرەك جەتكىزۋگە مۇمكىندىك بەرەدى. وسىلايشا، ورتا ءدالىزدىڭ كولىك باعىتى رەتىندەگى ماڭىزىمەن قاتار، حالىقارالىق تسيفرلىق بايلانىس ارناسى رەتىندەگى الەۋەتى دە ارتا تۇسپەك. جوبا دەرەكتەردى وڭدەۋ ورتالىقتارىن، جاساندى ينتەللەكت ينفراقۇرىلىمىن جانە بۇلتتى قىزمەتتەردى دامىتۋعا دا جول اشادى.
قازاقستان پرەزيدەنت قاسىم-جومارت توقاەۆ باستامانىڭ ماڭىزىن اتاپ ءوتىپ، جاڭا جەلىنى «ورتا ءدالىزدىڭ تسيفرلىق نۇسقاسى» دەپ اتادى. ال ازەربايجان باسشىسى يلحام اليەۆ جوبانىڭ ورتالىق ازيا مەن وڭتۇستىك كاۆكاز ەلدەرى اراسىنداعى بايلانىستى نىعايتۋعا ىقپال ەتەتىنىن ايتتى.
ترانسكاسپي بايلانىس جەلىسى «قازاقتەلەكوم» اق مەن ازەربايجاننىڭ AzerTelecom International كومپانياسى بىرلەسىپ قۇرعان CaspiLink B.V. كاسىپورنى ارقىلى جۇزەگە اسىرىلىپ جاتىر. قازىر قازاقستان مەن ازەربايجان اۋماعىنداعى كابەل ۋچاسكەلەرى ءوزارا جالعانىپ، وپتيكالىق جەلىلەر سىناقتان ءساتتى وتكەن.
