فوتو: Abdul Saboor / Reuters
فرانتسيادا ءومىر ءسۇرۋ قۇنىنىڭ وسۋىنە جانە بيلىكتىڭ ىشكى ساياساتىنا قارسى جاپپاي نارازىلىق اكتسيالارى ءوتتى. 17 قازاندا ەلدىڭ بىرنەشە قالاسىندا ۇيىمداستىرىلعان شەرۋلەرگە بيلىك مالىمەتىنشە، شامامەن 550 مىڭ ادام قاتىسقان. ال كاسىپوداق وكىلدەرى قاتىسۋشىلار سانى 800 مىڭعا جۋىقتاعانىن مالىمدەدى. بۇل تۋرالى DW جازدى، دەپ حابارلايدى “ادىرنا”.
شەرۋلەر پاريجدەن بولەك، ليون، مارسەل، تۋلۋزا، ليلل، ستراسبۋرگ، ليموج، بوردو جانە گرەنوبل قالالارىندا ءوتتى. قاتىسۋشىلار بيلىكتىڭ ىشكى ساياساتىنا قارسىلىق ءبىلدىردى. الايدا كەيبىر قالالاردا اكتسيالار توناۋ، ءورت قويۋ جانە مۇلىكتى ءبۇلدىرۋ وقيعالارىنا ۇلاستى.
فرانتسيا پرەمەر-ءمينيسترى سەباستەن لەكورنيۋدىڭ مالىمەتىنشە، ەل بويىنشا 1 200 ادام ۇستالعان. قۇقىق قورعاۋ ورگاندارى قىزمەتكەرلەرىنىڭ 150-ءى شەرۋشىلەرمەن بولعان قاقتىعىستار كەزىندە جاراقات العان.
پاريج، ليون جانە ستراسبۋرگ قالالارىندا پوليتسيا دەمونسترانتتارعا قارسى كوزدەن جاس اعىزاتىن گاز قولداندى. فرانتسيا استاناسىندا قارۋ-جاراق پەن وزگە دە تىيىم سالىنعان زاتتاردى الىپ جۇرگەن شامامەن 100 ادام ۇستالعان.
مارسەلدە نارازىلىق بىلدىرۋشىلەر مەريا عيماراتىنا كىرىپ، بىرنەشە دۇكەندى تالقانداعان جانە پوليتسيا بولىمشەسىنە باسىپ كىرۋگە ارەكەتتەنگەن. ليوندا تۋريستىك اقپارات ورتالىعى ورتەنسە، اۆينوندا شەرۋشىلەر پرەفەكتۋرانىڭ ىشكى اۋلاسىنا وتكەن. گرەنوبلدە مەريا عيماراتى بۇلىنگەن.
ال ليموج قالاسىندا شامامەن 140 جىلدىق تاريحى بار مەريا عيماراتىنا ءورت قويىلىپ، سونىڭ سالدارىنان قوڭىراۋ مۇناراسى قۇلاعان.
فرانتسيا ۇكىمەتى شۇعىل جيىن وتكىزدى
نارازىلىققا قاتىسۋشىلار سانى بيلىك كۇتكەن مەجەدەن ەداۋىر اسىپ ءتۇستى. الدىن الا بولجام بويىنشا، 17 قازاندا پاريجدە شامامەن 40 مىڭ ادام، ال ەلدىڭ باسقا وڭىرلەرىندە 150 مىڭعا جۋىق ادام شەرۋگە شىعۋى مۇمكىن ەدى.
وقيعالارعا بايلانىستى فرانتسيا ۇكىمەتى سەنبى كۇنى كەشكە شۇعىل كەڭەس وتكىزدى. پرەمەر-مينيستر سەباستەن لەكورنيۋ تارتىپسىزدىكتەرگە «اسا سولشىل توپتاردى» كىنالادى.
«بۇل زورلىق-زومبىلىقتى پرەزيدەنت سايلاۋى الدىنداعى دايىندىق رەتىندە پايدالانعىسى كەلەتىندەرگە اشىق ايتامىن: ءبىزدى قورقىتۋعا جول بەرمەيمىز. ەشكىم زورلىق-زومبىلىق ارقىلى ءوزىنىڭ ساياسي جوسپارىن تاڭۋعا قول جەتكىزە المايدى»، – دەپ جازدى ول X الەۋمەتتىك جەلىسىندە.
فرانتسيا پرەزيدەنتى ەممانيۋەل ماكرون دا جاعدايعا قاتىستى پىكىر ءبىلدىردى. ونىڭ ايتۋىنشا، قوعامدىق ءتارتىپتى بۇزىپ، پرەفەكتۋرالار مەن دۇكەندەرگە شابۋىل جاساعان، ءتىپتى مەريالاردى توناعان ادامدار زاڭ الدىندا جاۋاپ بەرەدى.
Reuters اگەنتتىگىنىڭ حابارلاۋىنشا، ءومىر ءسۇرۋ قۇنىنىڭ ءوسۋى بەلگيا، پورتۋگاليا جانە يتاليادا دا جاپپاي نارازىلىقتارعا سەبەپ بولعان.
بريۋسسەلدە وتكەن اكتسياعا بىرنەشە ءجۇز ادام قاتىسىپ، پوليتسيامەن قاقتىعىستار تىركەلدى. ال نارازىلىق بىرنەشە كۇننەن بەرى جالعاسىپ جاتقان ليسسابوندا 17 قازاندا ونداعان مىڭ ادام كوشەگە شىقتى.
يتاليانىڭ ميلان قالاسىندا دەمونستراتسيالار تارتىپسىزدىككە ۇلاسىپ، پوليتسيا كوزدەن جاس اعىزاتىن گاز قولداندى. بولونيادا قۇقىق قورعاۋ ورگاندارى سۋ شاشاتىن ارنايى تەحنيكا پايدالانىپ، جەتى ادامدى ۇستادى.
بۇدان بولەك، 17 قازاندا البانيادا دا سوڭعى ءبىر ايداعى كەزەكتى نارازىلىق اكتسيالارى ءوتتى. شەرۋشىلەر ۇكىمەتتەگى سىبايلاس جەمقورلىققا، جۇمىس ورىندارىنىڭ قىسقارۋىنا جانە ءبىلىم بەرۋ ساپاسىنىڭ تومەندىگىنە قارسىلىق ءبىلدىردى.
