فوتو: haqqin.az
ازەربايجاننىڭ عىلىم جانە ءبىلىم مينيسترلىگى يراننىڭ عىلىم، زەرتتەۋلەر جانە تەحنولوگيالار ءمينيسترى حوسەين سيماي-ساررافتىڭ ازەربايجانداعى ءبىلىم بەرۋ ماسەلەلەرىنە قاتىستى مالىمدەمەسىن ورىنسىز دەپ باعالادى. ۆەدومستۆو بۇل پىكىردى ەلدىڭ ىشكى ىستەرىنە ارالاسۋ ارەكەتى رەتىندە سانايدى, دەپ حابارلايدى “ادىرنا”.
مينيسترلىك مالىمدەمەسىندە ازەربايجاننىڭ ءبىلىم بەرۋ ساياساتىنا سىرتتان ارالاسۋعا جول بەرىلمەيتىنى اتاپ وتىلگەن. سونداي-اق مۇنداي ارەكەتتەرگە قاتاڭ توسقاۋىل قويىلاتىنى ايتىلعان.
«بۇل ورىنسىز مالىمدەمە ازەربايجاننىڭ ىشكى ىستەرىنە ارالاسۋ ارەكەتىنەن باسقا ەشتەڭە ەمەس. ەلىمىزدىڭ ىشكى ىستەرىنە، سونىڭ ىشىندە ءبىلىم بەرۋ ساياساتىنا ەشكىمنىڭ ارالاسۋىنا جول بەرىلمەيدى. مۇنداي ارالاسۋ ارەكەتتەرىنە قاتاڭ توسقاۋىل قويىلادى. ءبىز يراننىڭ رەسمي تۇلعالارىنا باسقا مەملەكەتتەردىڭ ىشكى ىستەرىنە ارالاسقانشا، ءوز ەلىندەگى ماسەلەلەرگە نازار اۋدارۋعا كەڭەس بەرەر ەدىك»، - دەلىنگەن حابارلامادا.
مالىمدەمەدە يرانداعى ەتنيكالىق ازەربايجانداردىڭ انا تىلىندە ءبىلىم الۋ ماسەلەسى دە كوتەرىلگەن.
“يران جۇرگىزىپ وتىرعان ساياساتتىڭ ناتيجەسىندە ەلدە ازەربايجان تىلىندە ءبىلىم بەرەتىن بىردە-ءبىر مەكتەپ جوق. جوعارى وقۋ ورىندارىندا دا ازەربايجان تىلىندە ءبىلىم بەرۋ قاراستىرىلماعان. ال يران حالقىنىڭ شامامەن 40 ميلليونىن وسى وڭىردە تەرەڭ تاريحي تامىرى بار ەتنيكالىق ازەربايجاندار قۇرايدى. ولار ونداعان جىلدار بويى انا تىلىندە ءبىلىم الۋ قۇقىعىنان ايىرىلىپ كەلەدى. يران يسلام رەسپۋبليكاسىنىڭ عىلىم، زەرتتەۋلەر جانە تەحنولوگيالار ءمينيسترى، سونداي-اق يراندا وسى ماسەلە بويىنشا پىكىر ءبىلدىرىپ جۇرگەن باسقا دا تۇلعالار ازەربايجاننىڭ ىشكى ىستەرىنە ارالاسۋدىڭ ورنىنا، ءدال وسى ماسەلەلەرمەن اينالىسىپ، ونداعان جىلدار بويى جالعاسىپ كەلە جاتقان تەڭدەسسىز ادىلەتسىزدىكتى جويۋ ءۇشىن شارالار قابىلداۋى كەرەك»، – دەپ اتاپ ءوتتى ۆەدومستۆو.
ايتا كەتەيىك، يراننىڭ عىلىم، زەرتتەۋلەر جانە تەحنولوگيالار ءمينيسترى حوسسەين سيماي ساراف الەۋمەتتىك جەلىدەگى جەكە پاراقشاسىندا ازەربايجان قىزدارىنىڭ ءبىلىم الۋى ءۇشىن يراننىڭ ەسىگى اشىق ەكەنىن جازعان.
«يران يسلام رەسپۋبليكاسىنىڭ عىلىم ءمينيسترى رەتىندە ازەربايجان قىزدارىنىڭ ءبىلىم الۋى ءۇشىن يران جوعارى وقۋ ورىندارىنىڭ ەسىگى اشىق ەكەنىن مالىمدەيمىن. بءىلىم الۋ قۇقىعىن جۇزەگە اسىرۋ ءۇشىن ءدىني ورامالىن شەشۋگە ءماجبۇر بولعان قىزداردى ءبىز قۇشاق جايا قارسى الىپ، جاقسى قابىلداي الامىز»،-دەگەن جازباسىندا.
داۋدىڭ تۋىنداۋىنا 21 قىركۇيەكتە قابىلداعان ازەربايجان ۇكىمەتىنىڭ قاۋلىسى سەبەپ بولعان. قۇجاتتا مەكتەپتەگى كيىم ۇلگىسى ءبىلىم بەرۋدىڭ زايىرلىلىق قاعيداتىنا ساي بولۋى كەرەكتىگى كورسەتىلگەن. وسىدان كەيىن بىرقاتار مەكتەپتە حيدجاب كيۋگە قويىلعان شەكتەۋگە قارسى نارازىلىقتار وتكەن. الەۋمەتتىك جەلى شەكتەلگەن. 12 قازاندا ازەربايجان ءىىم قاۋلىنىڭ ورىندالۋىنا كەدەرگى كەلتىردى دەگەن كۇدىكپەن 37 ادامنىڭ ۇستالعانىن حابارلاعان. ولارعا مەكتەپتەردىڭ جۇمىسىنا كەدەرگى كەلتىرىپ، قوعامدىق ءتارتىپتى بۇزدى دەگەن ايىپ تاعىلعان.
