تۇركىستان وبلىسىندا كوللەدج بەن مەكتەپ مۇعالىمدەرى جالعان ديپلوممەن جۇمىس ىستەگەن. وبلىستىق بءىلىم باسقارماسىنىڭ جۇمىسىنا تەكسەرۋ جۇرگىزگەن پروكۋرورلار بىرقاتار زاڭسىزدىقتى انىقتادى، دەپ حابارلايدى ”ادىرنا” ءتىلشىسى قازاقپاراتقا سىلتەمە جاساپ.
قاداعالاۋ ورگانى وكىلدەرىنىڭ ايتۋىنشا، باسقارما تاراپىنان وقۋشىلار مەن ستۋدەنتتەردى مەملەكەتتىك تاپسىرىس بويىنشا نەگىزسىز قابىلداۋعا قاتىستى جەتى دەرەك انىقتالعان.
كوللەدجدەردە كادرلار دايارلاۋعا مەملەكەتتىك تاپسىرىستى ورىنداۋ كەزىندە دە كەمشىلىكتەرگە جول بەرىلگەن. ياعني، تاپسىرىستى ورىنداۋ بارىسىندا ەڭبەك نارىعىنداعى قاجەتتى ماماندار دۇرىس تاڭدالماعان.
«شەتەلگە شىعىپ كەتكەن ءبىلىم الۋشىلارعا نەگىزسىز قارجى اۋدارۋ مەن مۇعالىمدەردىڭ جالعان ديپلوم پايدالانۋ ارقىلى جۇمىسقا ورنالاسقان 35 فاكتىسى انىقتالدى. بۇل فاكتىلەر بويىنشا قازىرگى تاڭدا سوتقا دەيىنگى تەرگەۋ باستالدى»،- دەيدى تۇركىستان وبلىستىق پروكۋراتۋراسىنىڭ باسقارما پروكۋرورى دۋلات اشىربەكوۆ.
”ادىرنا” ۇلتتىق پورتالى
