مەكتەپ ديرەكتورلارى مەن مۇعالىمدەر سىيلىق العان جاعدايدا قىلمىستىق جاۋاپكەرشىلىككە تارتىلادى. بۇل تۋرالى سىبايلاس جەمقورلىققا قارسى ءىس قيمىل اگەنتتىگىنىڭ الماتى وبلىسى بويىنشا دەپارتامەنتى ايتتى، دەپ حابارلايدى «ادىرنا» ءتىلشىسى.
«قازاقستاندا ورتا ءبىلىم تەگىن بەرىلەدى. بارلىق مەكتەپتە الىمدارعا قاتاڭ تىيىم سالىنادى. وسىعان قاراماستان، الماتى وبلىسى بويىنشا سىبايلاس جەمقورلىققا قارسى قىزمەتكە 1424 Call-ورتالىعى ارقىلى مەكتەپتەردەگى الىمدار فاكتىلەرى بويىنشا 20-دان اسا ءوتىنىش ءتۇستى. بۇل رەتتە ۆەدومستۆودا اتالعان زاڭسىز ارەكەتتەر ءۇشىن جاۋاپكەرشىلىك تۋرالى ەسكە سالىنعان»،—دەدى باسقارما.
دەپارتامەنت زاڭسىز ماتەريالدىق سىياقى مەن پارا الۋ ءۇشىن اكىمشىلىك جانە قىلمىستىق جاۋاپكەرشىلىك قاراستىرىلعانىن اتاپ ءوتتى.
«مەكتەپ ديرەكتورلارىنا اكىمشىلىك سىبايلاس جەمقورلىق ءۇشىن 600 اەك ايىپپۇل سالىنادى، ال قىلمىستىق جاۋاپكەرشىلىككە تارتىلسا، مۇلكى تاركىلەنە وتىرىپ، پارا سوماسىنىڭ 20 ەسەلەنگەن مولشەرىندە ايىپپۇل سالۋدان باستاپ 15 جىلعا دەيىنگى مەرزىمگە باس بوستاندىعىنان ايىرۋ جازاسى بەلگىلەنەدى. ال مۇعالىمدەرگە قۇنى 10 اەك-تەن اساتىن سىيلىق بەرۋگە تىيىم سالىنادى. ەگەر زاڭبۇزۋشىلىق بولعان جاعدايدا 2000 اەك دەيىن ايىپپۇل تۇرىندەگى قىلمىستىق جاۋاپكەرشىلىككە تارتىلادى»،—دەلىنگەن حابارلامادا.
