Mektep dırektorlary men muǵalimder syılyq alǵan jaǵdaıda qylmystyq jaýapkershilikke tartylady. Bul týraly Sybaılas jemqorlyqqa qarsy is qımyl agenttiginiń Almaty oblysy boıynsha departamenti aıtty, dep habarlaıdy «Adyrna» tilshisi.
«Qazaqstanda orta bilim tegin beriledi. Barlyq mektepte alymdarǵa qatań tyıym salynady. Osyǵan qaramastan, Almaty oblysy boıynsha Sybaılas jemqorlyqqa qarsy qyzmetke 1424 Call-ortalyǵy arqyly mektepterdegi alymdar faktileri boıynsha 20-dan asa ótinish tústi. Bul rette vedomstvoda atalǵan zańsyz áreketter úshin jaýapkershilik týraly eske salynǵan»,—dedi basqarma.
Departament zańsyz materıaldyq syıaqy men para alý úshin ákimshilik jáne qylmystyq jaýapkershilik qarastyrylǵanyn atap ótti.
«Mektep dırektorlaryna ákimshilik sybaılas jemqorlyq úshin 600 AEK aıyppul salynady, al qylmystyq jaýapkershilikke tartylsa, múlki tárkilene otyryp, para somasynyń 20 eselengen mólsherinde aıyppul salýdan bastap 15 jylǵa deıingi merzimge bas bostandyǵynan aıyrý jazasy belgilenedi. Al muǵalimderge quny 10 AEK-ten asatyn syılyq berýge tyıym salynady. Eger zańbuzýshylyq bolǵan jaǵdaıda 2000 AEK deıin aıyppul túrindegi qylmystyq jaýapkershilikke tartylady»,—delingen habarlamada.
