كاسپي تەڭىزى جاعالاۋىنداعى سۋدىڭ ءتۇسى وزگەرىپ جاتىر. بۇل تۋرالى كۋاگەرلەر ۆيدەوعا ءتۇسىرىپ العان، دەپ حابارلايدى “ادىرنا” ۇلتتىق پورتالى.
تابيعات قۇبىلىسىنا ماڭعىستاۋ وبلىسىنىڭ ەكولوگيا دەپارتامەنتى پىكىر ءبىلدىردى. وبلىستىڭ باس ەكولوگى رۋسلان توكەنوۆتىڭ ايتۋىنشا، وقيعا ورنىنا ماماندار جىبەرىلگەن. ونىڭ ايتۋىنشا، سۋدىڭ ءتۇسىنىڭ وزگەرۋىنە جىل سايىنعى قۇبىلىس – قوڭىر بالدىردىڭ جاعاعا شىعۋى اسەر ەتكەن.
ال كيريلل پاۆلوۆتىڭ Telegram-ارناسىندا حابارلاعانداي، تەڭىز جاعالاۋىنداعى سۋ ءتۇسىنىڭ وزگەرۋىنە سولداتسكي جاعاجايى ايماعىنداعى ارنادان قوسىلعان قوڭىر ءتۇستى لاس سۋ سەبەپ بولعان.
قازىر ۋچاسكەدە ەكولوگتار جۇمىس ىستەپ جاتىر. ولار سۋ سىناماسىن الادى. تەست ناتيجەلەرى كەيىنىرەك جاريالانادى.
ال «ماەك-قازاتومونەركاسىپ» جشس 1-جەو-دان تازا سۋ شىعاتىنىن ايتىپ، لاس سۋعا قاتىستى كاسىپورىننىڭ كىناسى جوق ەكەنىن مالىمدەدى.
